Nakonyana kuzwa fa kolobelezwa, Jesu akalisa kukutaza kuli: ‘Mubuso wa Mulimu u fakaufi.’ Balutiwa bamulatelela hanaanze apotoloha mwa Galilea ni mwa Judea. Jesu hanaakutezi habo yena kwa Nazareta, aya kwa sinagoge, akwalula muputo wa Isaya, mi aubala ka kutiisa, ali: ‘Jehova unifile moya okenile ilikuli nikutaze taba yende.’ Taba yeo neitalusañi? Neitalusa kuli nihaike kuli batu nebabata kubona Jesu aeza limakazo, libaka lelituna hanaaamuhezi moya okenile neli kuli akutaze taba yende. Cwale abulelela bane bamuteeleza kuli: ‘Kacenu bupolofita bo butalelelizwe.’

Hasamulaho, Jesu aya kwa Liwate la Galilea, ili kwanaakopani ni balutiwa bahae babañwi babane ili bane bali mandui. Abamema kuli: ‘Hamu nilatelele, mi nika mifetula kuba bayambi ba batu.’ Neli Pitrosi, Andreasi, Jakobo, ni Joani. Honafo, basiya pisinisi yabona ya bundui ni kumulatelela. Baya mwa Galilea kaufela, inze bakutaza ka za Mubuso wa Jehova. Nebakutalize mwa masinagoge, mwa misika, ni mwa mikwakwa. Buñata bobutuna bwa balatelela kone baya kaufela. Litaba ka za Jesu zayamba mwa libaka kaufela, kuyo fita ni kwa Siria.

Hamulaho wa nako, Jesu afa babañwi kwa balateleli bahae maata akufolisa batu ni kuleleka madimona. Babañwi baya ni yena hanaanze akutaza mwa muleneñi ni muleneñi ni mwa munzi ni munzi. Basali babañwi bane basepahala, kukopanyeleza Maria Magdalena, Joana, Suzana, ni basali babañwi, nebababalela Jesu ni balateleli bahae.

Hasamulaho wa kuluta balutiwa bahae, Jesu abaluma kuyo kutaza. Hane banze bazamaya mwa Galilea kaufela, batu babañata baba balutiwa mi bakolobezwa. Kacwalo, batu babañata nebabata kuba balutiwa kuli mane Jesu ababapanya kwa simu yetokwa kukutulwa. Kihaa li ku bona: ‘Mulapele ku Jehova kuli alume babeleki babañata bato kutula licalo.’ Hasamulaho, aketa ba 70 kwa balutiwa bahae ni kubaluma ka likwata kuyo kutaza mwa Judea kaufela. Nebalutile mifuta ya batu kaufela ka za Mubuso. Balutiwa hane bakutile, nebanyolezwi  kutaluseza Jesu zeneezahalile. Hakuna zanaakona kueza Diabulosi kuli atuhelise musebezi wa kukutaza.

Jesu naaboni teñi kuli balutiwa bahae nebaka zwelapili kueza musebezi wa butokwa wo hasaa kutezi kwa lihalimu. Naababulelezi kuli: ‘Mukutaze taba yende mwa lifasi kaufela. Mulute batu ka za Linzwi la Mulimu, mi mubakolobeze.’