Kinondanonda na pābatyijibwe Yesu, wāshilwile kusapula’mba: ‘Bulopwe bwa Leza bubafwena pabwipi.’ Bandi bana ba bwanga bādi benda bamulonda paādi wenda mu Ngadilea ne mu Yudea. Yesu paājokēle mu kibundi kyabo kya Nazala, wāendele ku shinankonka, wāpūtula muvungo wa Isaya, kātange’o na diwi ditunduke amba: ‘Yehova i mumpe mushipiditu ujila mwanda wa nsapule myanda miyampe.’ Le bino binenwa byādi bishintulula bika? Byādi bishintulula’mba, nansha bantu byobādi basaka kumona Yesu ulonga bingelengele, inoko bubinga bukatampe bwaātambwidile mushipiditu ujila i kusapula myanda miyampe. Ebiya wāsapwila bantu bādi bamuteja amba: ‘Dyalelo, buno bupolofeto bubafikidila.’

Kupwa, Yesu wāenda ku Dijiba dya Ngadilea, wātana’ko babiluwe ba lui baná, bene bāikele ke bandi bana ba bwanga. Wēbetyile amba: ‘Nondei, nkemwalamuna kemudi babiluwe ba bantu.’ Abo bene i ba Petelo, Andele, Yakoba, ne Yoano. Ponka na ponka bāleka kabo kaji ka buluwe kebamulonda. Bādi benda basapula myanda ya Bulopwe bwa Yehova mu Ngadilea monso. Bādi basapula mu mashinankonka, mu mansoko, ne mu bipito. Kibumbo kikatampe kyādi kibalonda konso kobādi benda. Myanda ya Yesu yāzambalele konsokonso, enka ne kulakula kwine ku Shidea.

Mwenda mafuku, Yesu wāpēle balondi bandi bamo bukomo bwa kubelula bantu babela ne kupanga bandemona. Bakwabo nabo bādi benda nandi paādi wenda usapula mu kibundi ne kibundi, kikatampe ne kityetye. Bana-bakaji bamo ba kikōkeji, mubadilwa ne ba Madia mwine Makadala, Njoana, Suzana, ne bakwabokwabo, bādi bengidila Yesu ne balondi bandi.

Yesu pa kupwa kufundija bana bandi ba bwanga, wēbatumine bakasapule. Pobādi benda mu Ngadilea monso, bantu bavule bāikele ke bana ba bwanga, bābatyijibwa ne kubatyijibwa. Kwādi bantu bavule bādi basaka kwikala bana ba bwanga, Yesu wēbadingakenye na budimi bwafikikala pa kwangulwa. Yesu wānenene amba: ‘Lombai Yehova atume bengidi bavule ba kwangula.’ Mwenda mafuku, wātonga’mo bana ba bwanga 70, wēbatuma babidi-babidi bakasapule mu Yudea monso.  Bādi bafundija bantu ba miswelo yonso myanda ya Bulopwe bwa Leza. Bana ba bwanga pobājokele, bādi na kipyupyu kya kusapwila Yesu byālongekele. Dyabola wātuninye kulonga kintu nansha kimo pa kwimika mwingilo wa busapudi.

Yesu wālongele bukomo bwandi bonso amba bandi bana ba bwanga bendeleje uno mwingilo wa mvubu, shi aye wakajokela mūlu. Wēbasoñenye amba: ‘Sapulai myanda miyampe pano pa ntanda ponso. Fundijai bantu Kinenwa kya Leza, ne kwibabatyija.’