Mutantshi mukese panyima pa batismo wa Yezu, wakabanga kuyisha ne: ‘Bukalenge bua Nzambi bukadi pabuipi.’ Bayidi bende bavua bamulonda pavuaye wenda unyunguluka mu Galela ne mu Yuda. Pavua Yezu mupingane kuabu ku Nazaleta, wakaya mu nsunagoga, kubululaye muvungu wa Yeshaya, kuwubalaye ne dîyi dikole ne: ‘Yehowa mmumpeshe nyuma muimpe bua nyishe lumu luimpe.’ Bualu ebu buvua bumvuija tshinyi? Buvua bumvuija ne: nansha muvua bantu basue bua Yezu ikale wenza bishima, mudimu munene uvuabu bamupeshile nyuma muimpe uvua wa kuyisha lumu luimpe. Pashishe wakambila bantu bavua bamuteleja ne: ‘Mêyi a buprofete aa mmakumbane lelu eu.’

Pashishe Yezu wakaya ku Mbuu wa Galela, muaba uvuaye mupetele bayidi bende banayi bavua balobi. Wakababikila wamba ne: ‘Ndondayi, nennuvuije balobi ba bantu.’ Bayidi aba bavua: Petelo, Andele, Yakobo, ne Yone. Bakalekela diakamue mudimu wabu wa diloba, kumulondabu. Bakaya mu Galela mujima, bayisha Bukalenge bua Yehowa. Bavua bayisha mu nsunagoga, mu bisalu, ne mu njila. Musumba munene wa bantu uvua ubalonda muaba wonso uvuabu baya. Lumu lua Yezu luakatangalaka miaba yonso, too ne mu Sulia.

Mu bungi bua matuku, Yezu wakapesha bamue ba ku bayidi bende bukole bua kuondopa bantu ne kuipata bademon. Bakuabu bavua baya nende mu mudimu wa kuyisha mu tshimenga ne mu tshimenga ne mu musoko ne mu musoko. Bantu bakaji ba bungi ba lulamatu bavua bambuluisha Yezu ne bayidi bende ne bivuabu nabi dijinga. Munkatshi muabu muvua Mariya wa ku Magadala, Yoana, Suzana ne bakuabu.

Yezu mumane kulongesha bayidi bende, wakabatuma bua kuyisha. Pavuabu benda banyunguluka mu Galela, bantu bakuabu ba bungi bakalua bayidi, bobu kubabatiza. Bua mushindu uvua bantu ba bungi bajinga kulua bayidi, Yezu wakabafuanyikija ne budimi bukavua bukumbane bua kunowa. Wakamba ne: ‘Sambilayi Yehowa bua atume bena mudimu ba bungi bua kunowa bia pa madimi.’ Wakalua kusungula bayidi 70, kubatumaye babidi babidi bua kuyisha mu  Yudaya mujima. Bakalongesha bantu ba mishindu yonso malu a Bukalenge. Pavua bayidi balukile, bavua ne mioyo kuulu kuulu bua kulondela Yezu malu avua menzeke. Kakuvua bualu buvua Diabolo mua kuenza bua kuimanyika mudimu wa kuyisha to.

Yezu wakenza muende muonso bua bayidi bende batungunuke ne kuenza mudimu wa mushinga eu panyima pa dipingana diende mu diulu. Wakabambila ne: ‘Nuyishe lumu luimpe pa buloba bujima. Nulongeshe bantu Dîyi dia Nzambi, nubabatize.’