Omu Yesu vamumbapachishile kamwahichile lwola lwalusukuko, aputukile kwambulula ngwenyi: ‘Wangana waKalunga unapandama.’ Tumbaji twenyi vamukavangijilenga omu ayilenga nakwambulula munganda yaNgalileya naYuleya. Kahomu akindulukile kwimbo lyenyi kuNazaleta, ayile musunangonga nakuvungulula mukanda wakuvunga waIsaya nakuutanga nalizu lyakukanguka ngwenyi: ‘Yehova nanguhane shipilitu yajila mangana ngwambulule mujimbu wamwaza.’ Uno echi chalumbunwine ika? Chalumbunwine nge, Yesu vamuhanyine shipilitu yajila mangana ambulule mujimbu wamwaza uze wapwile mulimo waulemu chikuma, numba tuhu vatu vasakile alingenga vyuma vyakukomwesa. Kaha alwezele vatu vaze vapwile nakumwivwilila ngwenyi: ‘Ou upolofweto unatesamo likumbi lyalelo.’

Kufumaho, Yesu ayile kuKalungalwiji waNgalileya, kuze awanyine tumbaji twenyi vawana vaze vapwile vaka-kuta vaishi. Ngocho avasanyikile nakuvalweza ngwenyi: ‘Ngukavangizenunga, kaha nangumilingisa mupwenga muvaka-kuta vatu.’ Majina avo vapwile Petulu, naAndelei, naYakova naYowano. Hahaze vene, vasezele moji avo nakumukavangiza. Kaha vayile muNgalileya mwosena nakwambulula vyaWangana waYehova. Vambulwilenga mujisunangonga, nakuvihela vyakulanjishila namumikwakwa. Kaha vatu vavavulu vavakavilenga kala kweshoko vayilenga. Ngocho vyuma alingilenga Yesu vavitachikijile kuvihela kwosena swi nakuSulya.

Kutwala muze, Yesu ahanyine tumbaji twenyi ngolo jakuka vaveji nakulovola vandemone. Tumbaji vamwe vayilenga nenyi nakwambulula kunganda hinganda namumembo. Kaha mapwevo vakushishika vakufwana nge Maliya wakuMangatala, naYowana, naSuzana naveka, vazakaminenga Yesu natumbaji twenyi.

Omu Yesu akumishile kunangula tumbaji twenyi, avatumine vayenga nakwambulula. Kahomu tumbaji twenyi vambulililenga muNgalileya, vatu vavavulu vavambapachishile nakupwa jino tumbaji. Hakuwana nge vatu vavavulu vasakile kupwa tumbaji, ngocho Yesu avafwanyishile kupwa nge wande uze unatomo. Jino ambile ngwenyi: ‘Lombenu Yehova amihane vaka-kuzata vavavulu mangana vezenga  nakwaha.’ Kufumaho, asakwile tumbaji 70 nakuvatuma vavali vavali mangana vayenga nakwambulula muYuleya mwosena. Ava tumbaji vambulwililenga vatu vakulisezaseza vyaWangana waKalunga. Omu tumbaji vakindulukile, valwezele Yesu vyuma vyasolokele. Liyavolo kahashile kuhonesa mulimo wakwambululako.

Yesu akafwile tumbaji twenyi mangana vatwaleho lika kuzata mulimo wakwambulula nomu mwakalinga hanakinduluka lyehi mwilu. Shikaho avalwezele ngwenyi: ‘Ambululenunga mujimbu wamwaza hamavu hosena. Nangulenunga vatu Mazu aKalunga nakuvambapachisa.’