Kufuma tuhu hamupapatishiliwu, Yesu watachikili kushimwina nindi: ‘Wanta waNzambi wunaswini dehi kwakwihi.’ Atumbanji twindi adiña nakumulondela hayileñayi muÑaliliya nimuYudeya. Yesu chafuntiliyi kumukala wawu kuNazareta, wayili musinagogi, wabakwili mukanda waIsaya, nawa watañili nezu datiyakana nindi: ‘Yehova nanyiki spiritu yajila kulonda nishimwini nsañu yayiwahi.’ Chumichi chatalishili mudihi? Chatalishili mukwila nawu hela chakwila antu akeñeleña kumumona Yesu nakukoña yihayamisha, ilaña chuma chaletesheli atambwili spiritu yajila hikushimwina nsañu yayiwahi. Kuhiñahu walejeli antu amutiyilileña nindi: ‘Dalelu iwu wuprofwetu wunashikijewi.’

Kufumahu, Yesu wayili kuKaluñalwiji kaÑaliliya, kwawaniniyi atumbanji twindi awana, adiña ayibinda anshi. Wayitambikili nakuyileja nindi: ‘Nlondelenu nawa nukuyibalumuna mwiikali ayibinda awantu.’ Adiña Petulu, Anderi, Yakoba niYowanu. Hohenohu ashiyili mudimu wawu wakukwata inshi, nakutachika kumulondela. Ayili mwahita Ñaliliya yejima, nakushimwina haWanta waYehova. Ashimwinineña mumasinagogi, kumamaketi nimunyikwakwa. Izaza deneni dawantu dayilondeleleña kwejima kwayileñawu. Nsañu yaYesu yataandili kwejima, kushika nikuSiriya.

Mukuhita kwampinji, Yesu wayinkeli akakumulondela amakwawu ñovu yakuuka antu nikufumisha andemoni. Amakwawu wayileña nawu hampinji yashimwinineñayi kumusumba nimusumba, nikumukala nimukala. Kwadiña ambanda amavulu ashinshika, kushilahu niMariya Mandaleni, Yowana, Suzana niamakwawu, amwakameneneña Yesu niakakumulondela.

Hanyima yakuyidizisha atumbanji twindi, Yesu watemeshelihu amakwawu nakushimwina. Chahitañeneñawu muÑaliliya, antu amavulu ekalili atumbanji nawa apapatisheweli. Antu amavulu akeñeleña kwikala atumbanji chakwila Yesu wayesekejeli neha dinashiki dehi hampinji yakwaañula. Wahosheli nindi: ‘Lombenu kudi Yehova atemeshi akakukalakala amavulu kulonda añuli mbutu.’ Mukuhita kwampinji,  watondeli atumbanji 70 nawa wayitemesheli ayedi-ayedi nakushimwina mwahita Yudeya yejima. Adizishili antu ashiyashana nsañu yaWanta. Atumbanji chafuntiliwu, afwilileña kumuleja Yesu yuma yamwekeni. Kwosi chuma cheliliyi Diyabolu chatwesheli kukañesha mudimu wakushimwinaku.

Yesu wazatili nañovu kukwasha atumbanji twindi kulonda akatwalekihu kuzata iwu mudimu walema neyi nafunti dehi mwiwulu. Wayilejeli nindi: ‘Shimwinenu nsañu yayiwahi mwahita iseki dejima. Dizishenuña antu Izu daNzambi, nawa muyipapatisheña.’