Lino papisile insita kufuma pano Yesu wabatiziwilwe, watandike ukusimikila ati: ‘Uwene wakwe Leza watiupalama.’ Asambi yamulondiile lino wapitanga umu Galili nu mu Yudeya. Lino Yesu waswilile uku Nazaleti kuno wakulile, waile umwi sunagogi, ayula ulupapulo ulupombwe lwakwe Ezaya nu kubelenga umwi izwi ilyuvwike ati: ‘Yeova atampeela umupasi wa muzilo ukuti nsimikile ilyasi lisuma.’ Uzye walozizye mwi? Walozizye umu kuti nanti cakuti antu yalondanga ukulola Yesu akucita ivizungusyo, mulandu ukalamba uno wapokelelile umupasi wa muzilo u kusimikila ilyasi lisuma. Waneenyile aakutikanga ati: ‘Ilelo usesemo uu wafikiliziwa.’

Lyene, Yesu waile kuli Yemba uwa Galili kuno waile azana asambi yakwe 4, aaombanga umulimo uwa kuvuwa inswi. Wayamile alino ayaneena ati: ‘Izini, nani namamulenga ukuya yakavuwa ya yantu.’ Antu yayo yaali a Petulo, Andeleya, Yakobo na Yoani. Papo kwene sile yasile yata umulimo uwa kuvuwa inswi nu kulondela Yesu. Yaile umu musumba uwa Galili monsi, ala yakusimikila pa Wene wakwe Yeova. Yasambilizyanga umu masunagogi, mu mamaliketi nu mu miseo. Antu aingi sana yayalondelanga konsi kuno yaya. Nupya ilyasi pali Yesu lyasalangine konsi, ukwikako nu mu Silya.

Lino papisile insita, Yesu wapeezile alondezi yakwe yamwi amaka aakupozya alwale nu kufumya iviwa. Yauze nayo yapisile nawe lino wasimikilanga umu misumba nu mu mizi. Nupya anaci ya utailo apaali Maliya Magadala, Yoana, Susana, na anaci yauze yasakamalanga Yesu na alondezi yakwe.

Pa cisila ica kusambilizya alondezi yakwe, Yesu wayatumile umu kusimikila. Lino yasimikilanga umu Galili, aingi yizile iyaya asambi nupya yabatiziwe. Antu aingi yalondanga ukuya asambi fwandi Yesu wayakolinye uku vilimwa ivili umupiipi nu kuzombolwa. Watiile: ‘Mwapepa ukuti Yeova atume aomvi na yauze akuomba umulimo wa kuzombola.’ Lino papisile insita, Yesu wasoolwile asambi 70 nu kuyatuma yaili yaili kuti yakasimikile umu Yudeya  monsi. Yasambilizye antu amisango yonsi pa Wene wakwe Leza. Lino asambi yawezile, yalondesyanga ukuneena Yesu ivyacitike. Kutaali icili consi icali nu kulenga Ciwa alesye umulimo uwa kusimikila.

Yesu wacisile vyonsi ivyali nu kulenga asambi yakwe yakatwalilile ukuomba umulimo uu ucindame na lino waswilila ukwi yulu. Wayaneenyile ati: ‘Mwasimikila ilyasi lisuma umu nsi yonsi. Nupya mwasambilizya antu Izwi lyakwe Leza nu kuyabatizya.’