A Zeezi sẽn deeg lisgã poor bilfu, a sɩngame n moond n yetẽ: ‘Wẽnnaam Rĩungã kolgame.’ Neb n lebg a karen-biisi, n da tũud-a n gilgd Galɩle ne Zide soolmã. A Zeezi wa n kuila a ba-yirã Nazarɛte. A kẽnga zʋɩf-rãmbã karen-doogẽ, n dɩk a Ezayi sebrã n zẽk a koɛɛg n karem yaa: ‘A Zeova kõo maam a vʋʋsem sõngã, sẽn na yɩl tɩ m moon koe-noogã.’ Woto rat n yeelame tɩ bõe? Rat n yeelame tɩ baa nebã sã n dat t’a Zeezi maan yel-soalma, bũmb ning sẽn kɩt t’a Zeova kõ-a vʋʋsem sõngã yaa sẽn na yɩl t’a moon koe-noogã. A sẽn karem n sa wa, a yeela nebã yaa: ‘Rũndã, yãmb sẽn wʋm gomd ningã pidsame.’

Rẽ poore, a Zeezi kẽnga Galɩle mogrẽ wã. Beenẽ, a yãa a karen-biis a naas sẽn yõgd zĩma. Yaa a Pɩyɛɛre, a Ãndere, a Zak la a Zã. A yeel-b lame yaa: ‘Wa-y n tũ-y maam. Mam na n kɩtame tɩ yãmb lebg neb baoodba.’ Zĩig pʋgẽ, b basa zĩmã yõgb n tũ a Zeezi. Bãmb ne a Zeezi gilga Galɩle, n moon a Zeova Rĩungã koɛɛga. B ra moonda zʋɩf-rãmbã karen-dotẽ, raasẽ la soayã zutu. B sẽn da kẽngẽ fãa, neb wʋsg n da tũud-ba. Nebã ra gomda a Zeezi yell zĩig fãa, baa hal Siiri menga.

A Zeezi wa n kõo a karen-biis kẽer tõog tɩ b sãoog nebã bãase, la b rig zĩn-dãmba. Kẽer me tũ-a lame n tɩ moon tẽn-bɛd la tẽn-bõones pʋsẽ. Pagb sẽn yaa wẽn-sakdb gesa a Zeezi ne a karen-biisã yelle. Wala makre, a Maari Madelɛne ne a Zann la a Suzann.

A Zeezi wilga a karen-biisã b sẽn tog n moon to-to, la a tʋm-b tɩ b tɩ moone. B sẽn wa n gilgd Galɩle n moond koɛɛgã, neb wʋsg lebga a Zeezi karen-biisi, n deeg koom lisgu. A mikame tɩ neb wʋsg n dat n lebg a karen-biisi, t’a yeel tɩ b yaa wa kood sẽn be pʋʋg pʋgẽ, n dat tigsgu. A yeelame: ‘Pʋʋs-y a Zeova n kos t’a tʋm neb sẽn na n wa sõng n tigsi.’ A Zeezi wa n yãka a karen-biis 70 n tʋm-b yiib-yiibu, tɩ b gilg Zide n moon  koɛɛgã. B sõnga neb buud fãa tɩ b bãng Wẽnnaam Rĩungã. Karen-biisã sẽn lebg n wa wã, b ra yãgdame n dat n togs a Zeezi b sẽn tõog n maane. A Sʋɩtãan ra ka tõe n maan baa fʋɩ n gɩdg koɛɛgã mooneg ye.

A Zeezi ra ratame t’a karen-biisã kell n moon koɛɛgã sẽn tar yõod wʋsgã, baa a sã n wa loog saasẽ. Rẽ n so t’a yeel-b yaa: ‘Moon-y koe-noogã dũniyã zĩig fãa. Zãms-y nebã Wẽnnaam goamã, la y sõng-b tɩ b paam koom lisgu.’