Paakandobva kubhabhatijwa, Jesu wakatanga kucumaera eciti: ‘Umambo hwa Mwari wa phedo.’ Paanonga ecicumaera ku Garirea no Judheya, vajiji vake vanonga vecitevera. Jesu paakahwirira ku dhorobha raakabarihwa Nazareta, wakaenda ku sinagoga, paakaguma wakafunungura muphukutu wa Isaia zve woverenga ngo izwi guru eciti: ‘Jehovha wakandipa mujimu mucena kuti ndikwanise kucumaera masoko akanaka.’ Izvi zvaida kunangenyi? Izvi zvaida kunanga kuti pikija vandhu vaida kuvona Jesu aciita zvishamaiso, iyena wakapuwa mujimu mucena kuti acumaere masoko akanaka. Ngokudaro wakabvunja vapurutani vake kuti: ‘Nyamasi ciporofita ici cazajika.’

Perapo, Jesu wakaenda ku Jombe ro Garirea, paakasongana no varongomuna vo vajiji vake, vainga vaveji. Iyena wakavakoka eciti: ‘Viyanyi na inini, ndinozomuita vatandi vo vandhu.’ Vainga, Pedru, Andereya na Jakobo. Ngo kukasika vakasiya basa ravo ro kuveja zve vakatevera Jesu. Ivona vakaenda Garirea yese, vacicumaera ngo pamusoro po Umambo hwa Jehovha. Vakacumaerazve mu masinagoga, mu matabherinakeri no mumakwanja. Vandhu vakawanda vaivateverera kwese kwavaienda. Masoko ngo pamusoro pa Jesu akandhandhaniswa kwese, pikija no ndhambo inga ku Siria.

Mu nguveyo, Jesu wakapekeja vamwe vo vateveri vake simba ro kurapa vandhu no kumbhiri-mbhija Madhimoni. Painga ecicumaera dhorobha ngo dhorobha zve mutundhu ngo mutundhu, vamweni vakaenda naye. Vanakaji vakawanda vakagondeka, vakadari inga Maria Madharena, Joana, Suzana no vamweni, vaingwarira Jesu no vateveri vake.

Paakapera kuroveja vajiji vake, Jesu wakavatumira kuti vaende kocumaera. Pavainga veciita hwendo ngo mative ese o Garirea, vazinji vakava vajiji asi avazivi kubhabhatijwa. Vazinji vaida kuva vajiji zvokuti Jesu wakavaezanisa no munda waibva woda kukotohwa. Iyena wakati: ‘Kumbiranyi Jehovha kuti atumire vashandi vamweni pa basa ro kukotora.’ Pakufamba ko nguva wakazosana vajiji vanokwana kuita 70 wovatuma vaviri vaviri kuti vaenda kucumaera ku Judhea kwese. Ivona vakajijisa vandhu vo mushovo  wese ngo pamusoro po Umambo. Vajiji povakahwirira, vaida maningi kubvunja Jesu ngo pamusoro po zvakaitika. Akuna ciro caikwaniswa kuitwa ndi Dhiabhu kuti apeje basa rokucumaera.

Jesu wakava no gwinyiso rokuti vajiji vake vaizoenderera mberi vaciita basa iri paaizohwirira mugore. Iyena wavakabvunja kuti: ‘Cumaeranyi masoko akanaka mu nyika yese. Jijisanyi vandhu ngo pamusoro po Mazwi a Mwari zve vabhabhatijenyi.’