Konima owala sho Jesus a ninginithwa okwa tameke okuuvitha ta ti: ‘Oshilongo nenge Uukwaniilwa waKalunga owu li popepi.’ Aalongwa oye mu landula sho te endaenda muGalilea nomuJudea ashihe. Sho Jesus a shuna kuNasaret, oshilando moka a putukila, okwa yi mosinagoga e ta yanuna embo lyaJesaja nokwe li lesha muule ta ti: ‘Jehova okwa pa ndje ombepo ondjapuki, opo ndu uvithile aantu onkundana ombwanawa.’ Shika osha hala okutya shike? Osha hala okutya nando aantu oya li ya hala okumona Jesus ta longo iikumithalonga, etompelo lya simana lyokupewa ombepo ondjapuki olyo okuuvitha onkundana ombwanawa. Opo ihe okwa lombwele aapulakeni ye a ti: ‘Nena ndjika ehunganeko ndika olya gwanithwa.’

Okuza mpono, Jesus okwa yi kefuta lyaGalilea, hoka a tsakanene naayuli yoohi yane mboka ya ka ninga aalongwa ye. Okwe yi ithana a ti: ‘Landulii ndje, notandi mu ningi aayuli yaantu.’ Omadhina gawo ogo Petrus, Andreas, Jakob naJohannes. Mbalambala oya thigi po oongeshefa dhawo dhokuyula oohi, noye mu landula. Okwe endaenda pamwe nayo muGalilea ashihe, tayu uvitha kombinga yUukwaniilwa waJehova. Oyu uvitha moosinagoga, pomahala gomalandithilo nomomapandaanda. Ongundu onene yaantu oye ya landula shaa mpoka ya yi. Onkundana kombinga yaJesus oya taandele shaa mpono, nokuli sigo okuSiria.

Mokweendela ko kwethimbo, Jesus okwa pe yamwe yomaalanduli ye oonkondo dhokwaaludha aantu nodhokutidha mo oompwidhuli. Okwa yi e ku uvithe pamwe naalongwa ye omulongo nayaali miilando ayihe nomomikunda adhihe. Aakiintu oyendji aadhiginini, mwa kwatelwa Maria Magdalena, Johanna, Susanna nayalwe oya yakula Jesus naalongwa ye.

Jesus sho a mana okudheula aalongwa ye, okwe ya tumu ye ku uvithe. Sho taye endaenda muGalilea ashihe, aantu oyendji oya ningi aalongwa noya ninginithwa. Oyendji oya li ya hala okuninga aalongwa, nomolwaashono Jesus a li e ya yelekanitha nepya ndyoka li li pokuteywa. Jesus okwa ti: ‘Galikaneni Jehova a tume aalongi oyendji keteyo.’ Konima  yethimbo okwa hogolola aalongwa 70 nokwe ya tumu ooyaali nooyaali ye ku uvithe muJudea alihe. Oya longo aantu yomaludhi agehe kombinga yUukwaniilwa. Sho ya galuka, oya li ya halelela okulombwela Jesus shoka sha ningwa po. Ondiyapoli kaya li tayi vulu okuninga po sha, opo yi imbe iilonga yokuuvitha.

Jesus okwa shilipaleke kutya aalongwa ye otaya ka tsikila okulonga iilonga mbyoka ya simana nokonima ngele a shuna megulu. Okwe ya lombwele a ti: ‘Uvitheni onkundana ombwanawa kombanda yevi alihe. Longeni aantu kombinga yOohapu dhaKalunga ne mu ya ninginithe.’