Etyi Jesus ambatisalwa ehimbika okuivisa okuti: ‘ Ouhanba wa Huku uli popepi.’ Ovalongwa avemulandula okuenda ko Galileia no ko Judeia. Etyi Jesus akondoka kepumda-umbo liae ko Nasalee, aende mondyuo ya Huku, aikula ovihonekwa via Isaia, atangela peulu okuti: ‘Jeova wampha ospilitu sandu opo ndyivise onondaka onongwa.’ Oityi otyo tyihangununa? Otyo tyihangununa okuti namphila ovanthu ankho vahanda okutala Jesus tyina alinga omahuviso, mahi otyipuka tyo tete Jesus atambulila ospilitu sandu ankho okuivisa onondaka onongwa. Konyima apopila ovanthu okuti: ‘Hono omulao ou, wafuisuapo.’

Jesus aende Kelunga lio Galileya, oku avasa ovalongwa vae vekuana vekahi nokufwa ombisi. Evepopila okuti: ‘Tuendei iya ame mandyimulingi ovafwi vovanthu.’ Ovalongwa ovo o Petulu na Andre na Tiagu na João. Liwa-liwa avasipo ovilinga viavo viokufua, avalandula Jesus. Aveho avaende ko Galileya, okukaivisa Ouhamba wa Jeova. Ankho vaivisila mondyuo yokufendela, nopopalasa no momatapalo. Ovanthu ovanyingi avevelandula kese oku vaya nako. Konomphangu ambuho ovanthu aveho aveivi ovipuka konthele ya Jesus alo umwe ko Silia.

Jesus aavela epondolo ovalanduli vae pala okuhakula ovavei nokutaata ovilulu movanthu. Akaivisa navakuavo mo mapunda-umbo elikalaila. Iya ovakai vekolelo nga Maliya Madalena na Joana na Susana na vakuavo, valingile atyiho vevila opo vakuateseko Jesus novalongwa vae.

Etyi Jesus alongesa ovalongwa vae, pahe evetumu vakalongese. Avakaivisa ko Galileia, iya ovanthu ovanyingi avakala ovalongwa iya avambatisalwa. Mokonda ovanthu ovanyingi ankho vahanda okukala ovalongwa, Jesus eveeleka nepia liayela. Apopi okuti: ‘Likuambelei ku Jeova opo atume vali ovaundapi.’ Konyima aholovona ovalongwa 70 evepungu vevali-vevali avakaivisa mo Judeia aiho. Avalongesa ovanthu aveho konthele Youhamba. Etyi ovalongwa  vakondoka, avakala nehambu lio kupopila Jesus etyi tyaenda-po. Petupu natyike ankho Eliapu lipondola okulinga opo litalameke ovilinga viokuivisa.

Jesus ankho una onthumbi yokuti ovalongwa mavatualako notyilinga otyo tyakolela tyina amakondoka keulu. Evepopila okuti: ‘Ivisei onondaka onongwa kombanda yohi aiho. Longesei ovanthu mouye konthele ya Huku nokuvembatisala.’