Obwire bukye, Yesu aherize kubatizibwa, akatandika kubuurira naagira ati: ‘Obukama bwa Ruhanga bwiriire haihi.’ Abeegi bakamukuratira obu yaabaire naagyenda omuri Galilaaya n’omuri Buyudaaya. Yesu ku yaagarukire omu tauni y’owaabo Nazareesi, akaza omu sinagogi, yaashuuruura omuzingo gwa nabi Isaaya, kandi yaashoma omu iraka rihango ati: ‘Yehova ampaire omwoyo gurikwera kubuurira abantu amakuru marungi.’ Ekyo kikaba nikimanyisa ki? Eki kikaba nikimanyisa ngu n’obu abantu baabaire nibenda ngu bareebe Yesu naakora eby’okutangaaza, enshonga nkuru ahabw’enki yaatungire omwoyo gurikwera kukaba kuri okubuurira amakuru marungi. N’ahabw’ekyo akagambira abaabaire bamuhurikiize ati: ‘Eri izooba obunabi obu bwahikiirira.’

Bwanyima, Yesu ku yaabaire naaraba aha nyanja Galilaaya, akareeba abajubi b’eby’enyanja bana bwanyima abaahindukire abeegi be. Akabagira ati: ‘Mwije munkuratire, naanye ndyabahindura abajubi b’abantu.’ Bakaba bari Petero, Anderea, Yakobo na Yohaana. Ahonaaho bakareka omurimo gw’okujuba eby’enyanja baamukuratira. Bakagyenda nawe Galilaaya, barikubuurira aha Bukama bwa Yehova. Bakabuurira omuri sinagogi, omu butare, n’aha nguuto. Abantu baingi bakabakuratira hoona ei baabaire baza. N’ahabw’ekyo amakuru agarikukwata ahari Yesu gakajanjaara omu bicweka bya hare nka Siria.

Ku haahingwireho obwire, Yesu akaha bamwe aha bakuratsi be amaani gw’okutambira abantu n’okubinga baadaimoni. Abamwe bakagyenda nawe arikubuurira omu tauni n’omu byaro. Abakazi bamwe abeesigwa, otwariiremu Mariamu Magadaleene, Yoana, Susaana, n’abandi baingi, bakahwera Yesu n’abakuratsi be.

Yesu ku yaaherize kutendeka abeegi be, akabatuma kubuurira. Ku baabaire nibaraba omuri Galilaaya, abandi baingi bakahinduka abeegi kandi baabatizibwa. N’ahabw’ekyo baingi bakaba nibenda kuhinduka abeegi kandi Yesu akabagyeragyeranisa n’omusiri oguhikire eigyesha. Akagira ati: ‘Mushabe Yehova ayohereze abagyesi abandi omu kugyesha.’ Bwanyima akatoorana abandi beegi be 70 kandi yaayoheereza babiri babiri kubuurira omuri Buyudaaya yoona.  Bakeegyesa abantu b’emiringo yoona aha Bukama. Abeegi ku baarugire kubuurira, bakaba baine ekihika ky’okugambira Yesu ebyabaho. Tihariho eki Omuregi yaabaire naabaasa kukora kuremesa omurimo gw’okubuurira.

Yesu ku yaagarukire omu iguru, akahamya ngu abeegi be baagumizamu nibakora omurimo ogu omukuru. Akabagira ati: ‘Mubuurire amakuru marungi omu nsi yoona. Mwegyese abantu ekigambo kya Ruhanga, kandi mubabatize.’