Jesusqa bautizakusqanmanta pisi tiemponman willayta qallarerqa: “Diospa Gobiernon qayllapiña”, nispa. Yachachisqasnintaj paywan tukuynin Galileata, tukuynin Judeata purimorqanku. Jesusqa Nazaret llajtanman kutipuytawan, sinagogaman yaykuspa Isaiaspa kʼuyuna libronta jatunmanta leerqa: “Jehová Diosqa atiyninta qowan sumaj willaykunata willanaypaj”, nispa. Runasqa milagrosta ruwananta munarqanku. Jesusqa mana milagrosta ruwanallanpajchu Diospa atiyninta japʼerqa, manaqa sumaj willaykunata willamunanpajpis. Payta uyarejkunamantaj nerqa: “Chay leesqayqa kunan juntʼakushan”, nispa.

Chantá Jesusqa Galilea qochaman rispa tawa pescadoreswan tinkorqa. Paykunataj yachachisqasninman tukorqanku. Jesusqa paykunata nerqa: “Qhepayta jamuychej, runa japʼej pescadoresman tukuchisqaykichej”, nispa. Paykunaqa karqanku: Pedro, Andrés, Santiago, Juan ima. Paykunataj chʼipasninkuta saqeytawan chay rato qhepanta rerqanku. Tukuy Galileatataj muyumorqanku Diospa Gobiernonmanta willaspa. Predicarqanku sinagogaspi, mercadospi, callespi ima. Ashkha runastaj qhepankuta rej kanku. Jesuspa ruwasqasninmantaqa tukuynejpi yachakorqa, karu llajta Siriapipis.

Tiemponmantaj Jesusqa wakin yachachisqasninman atiyta qorqa supayniyoj runasta, onqosqasta ima sanoyachinankupaj. Wakin yachachisqasnintaj paywan khuska predicaj kanku llajtamanta llajta, ranchomanta rancho. Wakin warmispis paywan rillajtaj kanku payta, yachachisqasninta ima yanapanankupaj. Chay warmis karqanku: María Magdalena, Juana, Susana, waj warmis ima.

Jesusqa yachachisqasninta wakichiytawan willajta kacharqa. Galileapi predicashajtinkutaj ashkha runas Jesuspa yachachisqasninman tukorqanku, bautizakorqanku ima. Ashkha runas Jesuspa yachachisqasnin kayta munarqanku. Chayrayku Jesusqa paykunata poqosqa chajrawan kikincharqa, nerqataj: “Jehová Diosmanta mañakuychej cosechanman oqharejkunata  kachamunanta”, nispa. Chantá Jesusqa 70 yachachisqasninta iskaymanta iskay kacharqa Diospa Gobiernonmanta tukuy Judeapi predicanankupaj. Kutimuspataj Jesusman willayta munarqanku predicamusqankumanta. Diabloqa ni imata ruwayta aterqachu mana predicanankupaj.

Jesusqa tukuy imata wakicherqa, pay cieloman kutipojtin yachachisqasnin willanallankupajpuni. Payqa nerqa: “Sumaj willaykunata jallpʼantinpi willaychej. Diospa Palabranmanta runasman yachachiychej, bautizaychejtaj”, nispa.