Jesusqa bautizakusqan qipallamanmi qatiqninkunawan Galileapi, Judea lawpipas Diosmanta willakustin purirqaku. Huk kutipim Nazaret llaqtanman kutiruspan, Isaiaspa qillqasqanta yupaychana wasipi Jesusqa kaynata leerqa: “Jehova Diosmi chuya espiritunwan akllawarqa sumaq willakuyta willakunaypaq”, nispa. Hinaspam nirqa: “Kay willakuykunatam kunan qawachkanchik”, nispa. Chaywanqa nichkarqa Diospa chuya espiritunwan milagrokuna ruwananmantaqa, taytanpa munaychakuyninmanta willakuynin aswan allin kasqantam.

Chaymantam Jesusqa Galilea quchaman rispan Pedrota, Andresta, Santiagota hinaspa Juanta tarirurqa challwa hapichkaqta, hinaspam nirqa: “Qatiwaychik, runakunataña challwanaykichikpaqmi yachachisqaykichik”, nispa. Paykunaqa challwasqankutam chaylla saqirurqaku, hinaspam Jesuswan kuskaña Jehova Diospa munaychakuyninmanta maypiñapas willakurqaku. Achka runakunapas Jesustam mayman riptinpas qatirqaku. Jesuspa willakusqanmantaqa Siria nacionpi runakunapas yacharurqakum.

Chaymantañataqmi Jesusqa wakin qatiqninkunaman atiyta qurqa unquqkunata sanoyachinankupaq hinaspa demoniokunata qarqunankupaq. Wakin qatiqninkunawanñataqmi rirqaku llaqtan-llaqtan Diosmanta willakuq. Rirqakutaqmi Maria Magdalena, Juana, Susana hinaspa wakin warmikunapas, paykunaqa Jesustawan qatiqninkunatam yanaparqaku.

Jesusqa qatiqninkunata sumaqta yacharachispanmi willakunankupaqña kacharqa. Paykunam achka runakunata yanaparqaku Jesuspa qatiqnin kanankupaq. Achkataqmi Jesustaqa qatiyta munarqaku, paykunatam Jesusqa tupachirqa cosechanapaqña kaq kawsaywan, hinaspapas qatiqninkunatam nirqa: “Diostayá mañakuychik achka cosechaqkuna kananpaq”, nispa. Chaymantam Jesusqa 70 qatiqninkunata akllarqa iska-iskay Judea lawpi Diosmanta willakunankupaq. Chay qatiqninkunaqa kutiramuspankum kusikuyllawanña imayna  kamusqankumanta Jesusman willakurqaku. Satanasqa manamá willakusqankutaqa harkakuyta atirqachu.

Jesusqa manaraq hanaq pachaman ripukuchkaspam qatiqninkunaman kaynata kamachirqa: “Enteron allpa pachapiyá Diospa munaychakuyninmanta willakamuychik hinaspayá bautizamuychik”, nispa. Jesusqa sumaqtaraqmi yachachirqa chayta ruwanankupaqqa.