Jesusqa bautizakusqan qhepamanmi predicayta qallariran: “Diospa gobiernonmi qayllaykamunña”, nispa. Discipulonkunaqa paywan kuskan viajaranku Galilea Judea llaqtakunata. Nazaret llaqtanman kutimuspataq sinagogata riran, jinaspa Isaiaspa qelqasqanta leeran: “Jehová Diosmi santo espiritunta qowaran allin willakuykunata predicanaypaq”, nispa. Milagrokunataña Jesús ruwaran chaypas, allin willakuykunata willananpaqmi astawanqa Diospa espiritunta chaskiran. Chaymi uyariqninkunata niran: “Kunanmi kay profecía junt’akun”, nispa.

Chay qhepamanmi Jesusqa Galilea lamar-qochaman riran chaypin tariran tawa discipulonkunata, paykunaqa challwaqkunan karanku, sutinkun karan Pedro, Andrés, Santiago, Juan. Jinan paykunata niran: “Qatikamuwaychis, jinaspa runakunata challwankichis”, nispa. Chaymi paykunaqa negocionkuta saqespa Jesusta qatikuranku. Paykunawanmi Galileaq sinagogankunapi, mercadonkunapi, callenkunapi ima Diospa gobiernonmanta predicaranku. Askha runakunan qatikuranku. Jesusmantaqa Siria nacionpiwanraqmi uyarikuran.

Tiempowanmi Jesusqa wakin discipulonkunaman atiyta qoran runakunata qhaliyachinankupaq, supaykunatapas runamanta qarqonankupaq. Jujkunataq Jesuswan kuska llaqtan-llaqtanta ayllun-ayllunta puriranku predicaspa. Dios sonqo warmikunapas yanaparankun, wakinmi karanku Juana, Susana, María Magdalena.

Discipulonkunata preparaspan Jesusqa kacharan predicamunankupaq. Jinan Galilea llaqtakunapi predicaranku, chaymi askha runakuna Jesuspa discipulon kaspa bautizakuranku. Askhan Jesuspa discipulon kayta munaranku, paykunatan Jesusqa compararan cosechanapaq chajrawan. Chaymi niran: “Diosmanta mañakuychis aswan askha llank’aqkunata cosechaman kachamunanpaq”, nispa. Qhepamanmi 70 discipulonkunata kacharan Judeapi predicanankupaq. Askha runakunamanmi  Diospa gobiernonmanta predicaranku. Predicasqankumanta kutimuspataq Jesusman willaranku imakunatachus ruwasqankumanta. ¡Manan Satanaspas jark’ayta atiranchu!

Jesusqa allintan discipulonkunata prepararan janaq pachaman ripusqan qhepamanpas kay pachapi predicashanallankupaq. Paykunatan niran: “Allin willakuykunatan mundontinpi predicankichis. Diospa siminta yachachispan bautizankichis”, nispa.