Kratko odkeda krstingja pe, o Isus počmingja te propovedinel: „E Devleskoro Carstvo tano paše“. Leskere učenikija džana sine lea džikote patujnela sine ki Galileja hem ki Judeja. Keda irangja pe o Isus ki pli diz, ko Nazaret, khuvgja ki sinagoga, phravgja o svitok taro Isaija hem angli sarinende čitingja: „O Jehova dengja man o sveti duh te šaj te propovedinav o šukar haberi“. Palo adava vakergja: „Akava proroštvo ispolningja pe avdive“. Iako o manuša mangena sine te dikhen sar o Isus kerela čudija, i glavno pričina soske ov dobingja sveti duh sine te propovedinel o šukar haberi bašo e Devleskoro Carstvo.

Palo adava, o Isus gelo ko Galilejsko More. Adari arakhlja štar učenikija, kola so sine ribarija. Ov vakergja lenge: „Aven mancar. Nane više te astaren mačhen, nego manušen“. Lengere anava sine Petar, Andrej, Jakov hem Jovan. Ola odma mukhle pumari buti hem gele palo Isus. Ola propovedinena sine bašo e Devleskoro Carstvo ki celi Galileja. Propovedinena sine ko sinagoge, ko pazarija hem ko ulice. Kaj so džana sine ola, o manuša da džana sine pali lende. Bašo Isus kerela pe sine lafi dži ko dur thana, čak ki Sirija.

Sar so nakhela sine o vreme, nesave učenikonge o Isus dengja mokj te šaj te sasljaren e manušen hem te palden e demonen. A javera džana sine lea džikote propovedinela sine tari diz ki diz hem taro gav ko gav. But verna džuvlja, maškar kola sine i Marija Magdalena, i Joana, i Susana hem javera, grižinena pe sine bašo Isus hem bašo leskere učenikija.

Otkeda obučingja ple učenikon, o Isus bičhalgja len te propovedinen. Džikote patujnena sine ki Galileja, ola pomožinena sine bute manušenge te prifatinen o haberi hem te krstinen pe. Adaleske so but manuša mangena sine te oven učenikija e Isuseskere, ov sporedingja len sar niva soj spremno baši žetva. Ov phengja: „Molinen e Jehova te bičhalel poviše rabotnikija baši žetva“. Pokasno, ov biringja 70 ple učenikija hem bičhalgja len duj po duj  te propovedinen ki Judeja. Ola propovedinena sine bašo Carstvo različno manušenge. Keda irangje pe, o učenikija sine but radosna hem edvaj adžikerena sine te vakeren e Isuseske sar nakhle. O Beng ništo našti kerela sine te čhinavel te propovedinel pe.

O Isus manglja leskere učenikija te propovedinen ponadari da otkeda ov ka iranel pe ko nebo. Adaleske vakergja lenge: „Propovedinen o šukar haberi ki celo Phuv. Sikaven e manušen bašo e Devleskoro Lafi hem krstinen len“.