Hari palo odova so krstindža pe, o Isus počmindža te propovedini: „E Devljeso Kraljevstvo tano paše.“ Oljese učenikija hine oljeja dži putujindža ki Galileja hem ki Judeja. Ked irindža pe ki piklji diz, ko Nazaret, o Isus khuvdža ki sinagoga, phravdža o svitak kotar Isaija hem anglo sarinende počmindža te čitini: „O Jehova dindža maje o sveti duh te šaj te propovedinav o šukar haberi.“ Sose o Isus phendža akava? Odoljese so o manuša manglje te dikhen sar o Isus čerela čudija, ama o glavno razlog sose ov dobindža sveti duh hine te propovedini o šukar haberi ando e Devljeso Kraljevstvo. Palo odova phendža: „Akava proročanstvo ispunindža pe avdije.“

Palo odova, o Isus dželo ko Galilejsko more. Uduri arakhlja štare učenikonen, kola hine ribarija. Ov phendža ljendže: „Aven mancar, hem me ka mothovav tumendže sar te roden e manušen isto sar ked rodena te astaren e mačhen“. Oljenge nava hine Petar, Andrija, Jakov hem Jovan. On odmah mukhlje pi buti hem dželje palo Isus. On propovedindže kotar e Devljeso Kraljevstvo ki celo Galileja. Propovedindže ko sinagoge, ko pazarija hem ko ulice. But manuša dželje kuri on dželje. Kotar na vačerdža pe ando Isus, čak hem ki Sirija.

Sar nakhlja o vreme, o Isus dindža moć pe učenikonendže te šaj te sačaren e manušen hem te ikaljen e demonen ando manuša. Avera dželje oljeja dži propovedindža, kotar diz ki diz hem kotar gav ko gav. But verna džuvlja, maškaro kola hine i Marija Magdalena, i Jovana, i Susana hem avera, brinindže pe kotar Isus hem kotar oljese učenikija.

O Isus sikavdža pe učenikonen te propovedinen hem palo odova bičhaldža ljen ko dizja hem ko gava. Dži propovedindže ki Galileja, pomožindže bute manušendže te prihvatinen o šukar haberi hem te krstinen pe. Odoljese so but manuša manglje te oven e Isusese učenikija, ov uporedindža ljen jekha njiva koja tani spremno asi žetva. Ov phendža: „Molinen e Jehova te bičhalji pobuter radnikija  asi žetva.“ Palo odova, birindža 70 učenikija hem bičhaldža ljen duj po duj te propovedinen ki Judeja. On propovedindže e Devljeso Kraljevstvo sa e manušendže. Ked irindže pe, o učenikija jedva adžičerdže te vačeren e Isusese sar nakhlje. O Beng naštindža ništa te čerel te čhinavi ljen te propovedinen.

O Isus manglja oljese učenikija te nastavinen te propovedinen hem ked ov ka irini pe ko nebo. Odoljese phendža ljendže: „Propovedinen o šukar haberi ki celo phuv. Sikaven e manušen ando e Devljeso Lafi hem krstinen ljen.“