Yesuusi cuuamihunni shiima yanna gedensaanni, ‘Maganu Mangiste gambissino’ yaanni sabbaka hanafi. Isi Galiilunna Yihudu qooxeessira sabbakara haˈri yannara rosaanosino ledosi hadhino. Yesuusi ilamino katama Naazireete higi woyite xaadu minira haˈri; hakkiicho isi Isayaasi maxaafa fane togo yee huurosi naggi asse nabbawi: ‘Dancha duduwo duduweemmo gede, Yihowa qullaawa ayyaana uyinoe.’ Hatto yaa mayyaate? Mannu Yesuusi maalale loosara hasiˈrinoha ikkirono, isi kayinni qullaawa ayyaana adhinohu dancha duduwo duduwate ikkinota coyiˈrino. Hakkiinni isi mannaho, ‘Tini masaalo techo woˈmitino’ yii.

Hakkunni gedensaanni Yesuusi Galiilu Baariwa haˈri. Hakkiicho qulxuˈme woshshaadannohu shoolu manninni xaadino; insa gedensoonni rosaanosi ikkitino. Isi togo yiinsa: ‘Ane hoode amme! Ani manna woshshaaddinannire asseemmoˈnena.’ Insa suˈmi Pheexiroosi, Indiriyaasi, Yaiqoobinna Yohaannisiiti. Insa hakkawoyintenni qulxuˈme woshshaada agurte Yesuusi hoode hadhino. Insa Galiilaho Maganu Mangiste daafira sabbakkino. Xaadu mine, dikkotenna dooggate sabbakkino. Martuwa baalawa lowo manni harunsinonsa. Yesuusi duduwi gobba baala woˈmi; wole agurina Sooriyaho heeˈranno manni nafa isi duduwo macciishshino.

Yannate gedensaanni, Yesuusi mite rosaanosira xiwantinore hursitannonna busha ayyaana fushshitanno wolqa uyinonsa. Wole rosaanosi isi ledo katamunni katama, hattono qachunni qacha hadhe sabbakkino. Megidelitte Maariyaami, Yohaana, Soosinnanna wolu ammanamino meenti Yesuusanna rosaanosi towaatino.

Yesuusi rosaanosi qajeelsi gedensaanni, sabbakkara soyino. Insa Galiilaho sabbakku yannara, wolu lowo mannino rosaano ikke cuuamino. Lowo manni Yesuusi rosaano ikka hasiˈrino; konni daafira Yesuusi insa midote iillino gidi gede ikkitinota coyiˈrino. Togo yiino: ‘Gide gamba assannoha lowo manna soyanno gede Yihowa huuccidhe.’ Yannate gedensaanni, Yesuusi rosaanosi giddonni 70  doore, lame lame asse Yihudu gobba baala soyino. Insa baalunku mannira Maganu Mangiste daafira rosiissino. Rosaano Yesuusiwa higgu woyite, assitinore isira kulate quqquxantino. Daawuloosi insa sabbakkannota hoola didandiino.

Yesuusi iimira haˈri gedensaannino rosaanosi sabbaka agurtannokki gede kulinonsa. Togo yiinonsa: ‘Uulla woˈmate dancha duduwo dudubbe. Mannaho Maganu Qaale rosiisse, hattono cuuˈe.’