E leʻi umi talu ona māeʻa le papatisoga o Iesu, ae amata loa ona ia talaʻi atu: ʻUa latalata mai le malo o le Atua.’ A o ia femalagaaʻi solo i Kalilaia ma Iutaia, na mulimuli atu ona soo iā te ia. Ina ua ia toe foʻi i lona nuu o Nasareta, ona ia alu atu lea i le sunako, ua tatala le tusi tāʻai a Isaia ma faitau leotele: ʻUa foaʻi mai e Ieova le agaga paia ina ia mafai ai ona ou talaʻi atu le tala lelei.’ O le ā le uiga o lenā mea? O lona uiga, e ui lava sa fia vāai tagata o faia e Iesu vavega, ae o le māfuaaga autū na ia maua ai le agaga paia, ina ia mafai ai ona ia talaʻi atu le tala lelei. Ona ia faapea atu lea i lana ʻaufaalogologo: ʻUa faataunuuina i le asō lenei valoaga.’

Ona sosoo ai lea ma le alu atu o Iesu i le sami o Kalilaia, lea na ia feiloaʻi ai i ona soo e toʻafā o ni tagata faifaiva. Na valaaulia i latou e Iesu: ʻInā mulimuli mai ia iā te aʻu, ou te faia outou ma faifaiva i tagata.’ O i latou nei e aofia ai Peteru, Aneterea, Iakopo ma Ioane. O le taimi lava lenā na latou tuua ai a latou upega ae mulimuli atu iā Iesu. Na latou talaʻi i Kalilaia atoa e faatatau i le Malo o Ieova. Na latou talaʻi i sunako, maketi ma luga o auala. O so o se mea lava na latou ō i ai, na mulimuli atu iā i latou se motu o tagata e toʻatele. Na salalau solo tala e uiga iā Iesu, ma na oo atu lava i Suria.

A o faagasolo taimi, na tuuina atu e Iesu i nisi o ona soo le mana e faamālōlō ai tagata ma tutuliese ai temoni. Na ō faatasi Iesu ma isi a o ia talaʻi mai i lea aai i lea aai, ma lea nuu i lea nuu. Na tausia Iesu ma ona soo e le toʻatele o fafine faamaoni e aofia ai Maria le Makatala, Ioana, Susana ma isi fafine.

Ina ua māeʻa ona toleniina e Iesu ona soo, ona ia auina atu lea o i latou e talaʻi. A o latou femalagaaʻi i Kalilaia, e toʻatele isi tagata na avea ma soo ma papatisoina. O le toʻatele o i latou na mananaʻo e avea ma soo, na faatusaina ai i latou e Iesu i se fanua ua matua mo le seleselega. Na fetalai Iesu: ʻIa tatalo iā Ieova e auina mai nisi ʻaufaigaluega e faia le galuega o le seleselega.’ Mulimuli ane, na filifilia e Iesu le toʻa 70 o ona soo ma auina atu i latou taʻitoʻalua e  talaʻi i Iutaia atoa. Na latou aʻoaʻo atu i so o se tagata e faatatau i le Malo. Ina ua toe foʻi mai nei soo, sa latou naunau e faamatala atu iā Iesu mea na tutupu. E leʻi mafai e le Tiapolo ona taofia le galuega talaʻi.

Sa faamautinoa e Iesu e faaauau pea ona faia e ona soo lenei galuega tāua pe a ia toe foʻi i le lagi. Na faapea atu Iesu iā i latou: ʻIa talaʻi le tala lelei i le lalolagi atoa. Ia aʻoaʻo tagata e faatatau i le Afioga a le Atua ma papatiso i latou.’