Mafuku apeela n’aye kubatshishiibwa, Yesu baabangile kulungula bantu shi: ‘Bufumu bw’Efile tabudi peepi.’ Balondji abaamulondele pabaadi ende ku Ngalileeya na ku Yudeya. Nsaa ibaadi Yesu mwalukiile kwaabo ku Nazareete, baayile mu kitumbwilo, aye nkufungula mufungofungo wa Yeeshaya, eubadika n’eyi dibukopo shi: ‘Yehowa mumpe kikudi kyaye kiselele antuma bwa kuukisha mukandu wibuwa.’ Byabya bibaadi abipatuula kinyi? Bibaadi abipatuula bino: Sunga by’ekala shi bantu abaadi abakimbi kumona Yesu kwakitshi bilengyeleshi, kabingilo kakata ka kupeta kikudi kiselele kabaadi ka kulungula mukandu wibuwa. Kunyima, balungwile bantu abaadi abamuteemesha shi: ‘Leelo uno buno butemuki bubalombana.’

Akupu, Yesu bayiile ku Kalunga ka Ngalileeya, kubaadi mufumankane na balondji baaye bananka abaadi balobi ba mishipa. Aye nkwibetanyina shi: ‘Fikaayi nundonde, nenwikasha balobi ba bantu.’ Kubaadi, Mpyeele, Andree, Shake, na Yowano. Anka paapa abalekyele makondja aabo abo nkumulonda. Abayiile mu Ngalileeya eese na kulungula pabitale Bufumu bwa Yehowa. Abaadi abalungula mu bitumbwilo, mu ma mbalo a bisalwe na mu miseese. Kibumbu kiikata kya bantu kibebalondanga kooso kwabende. Mukandu upya pabitale Yesu nkupalakana mbalo yooso, mpaa na mu Sirii.

Mwenda mafuku, Yesu baadi mupe bangi ba ku balondji baaye bukome bwa kubinga bikudi bibi. Bangi abayiile naaye na kulungula mukandu wibuwa mu musoko na musoko na mu kibundji na kibundji. Bana bakashi bebungi basha lukumiino, mp’anka na Maadiya a mu Mangadala, Jane, Suzaana, na bangi abaadi bapasukile Yesu na balongi baaye.

Kunyima kwa kulongyesha balondji baaye, baadi mwibatume mu bulungudi. P’abaabadi abatambuka mu Ngalileeya, bangi bantu bebungi abafikile balondji abo nkubatshishiibwa. Bu bibaadi bebungi abakimbi kwikala bu balondji, Yesu baadi mwibapwandjikishe na efuba ditadidi peepi na kuumbulwa. Bambile shi: ‘Tekaayi kwi Yehowa bwa kutuma bafubi bebungi bwa kuumbula.’ Kunyima basangwile bangi ba ku balondji baaye 70 aye nkwibatuma babidi babidi mu  bulungudi mu Yudeya eese. Abo nkulongyesha bantu ba bipaso byooso pabitale Bufumu. Pababaadi balukiile, abaadi na muloo wa kulungula Yesu bibaadi bikitshikye. Dyabulu t’abaadya kukita kintu su nkimune bwa kwimika mudimo wa bulungudi.

Yesu baadi mushinkamishe shi balondji baaye abaadi na kya kutungunuka na uno mudimo wi na muulo kunyima kwa’ye kwaluka mwiyilu. Bebalungwile shi: ‘Lungulayi mukandu wibuwa mu nsenga ishima. Nulongyeshe bantu pabitale Eyi dy’Efile Mukulu nwibabatshishe.’