Yesu yange eren batisema kera yô, fese je maa a hii u pasen kwagh kaan ér: ‘Tartor u Aôndo zurum ve.’ Yange lu pasen kwagh ningir ken Galilia man tiôntar u Yudia cii, mbahenen nav dondon un ijime. Yesu za hiden hen geri u Nasareti, ape ya na lu la yô, a kar a yem ken Shinagoge, a za bugh ihyurenruamabera u Yesaia, a ôr ngeren ugen ker genger genger ér: ‘Yehova nam icighan jijingi ér m pase loho u dedoo.’ Inja i kwagh ne ér nyi? Inja na yô, yange ior ve soo ér Yesu a er uivande, kpa kwagh u yange i na Yesu jijingi ér a er jighilii yô, lu u pasen loho u dedoo. Yesu ôron mkaanem mara yô, a kaa a mba lu pasen ve kwagh la ér: ‘Kwaghôron u profeti ne kure nyian.’

Tsô Yesu due ken Shinagoge kar yem shin kpezegemnger u Galilia, maa a za zua a mbakôronishu mbagenev unyiin, mba ve va hingir mbahenen nav yô. Yesu yila ve kaa ér: ‘Va se yem nen, me gema ne, ne hingir mbakôron ior.’ Ve yô, lu Peteru, man Anderia man Yakobu man Yohane. Fese je maa ve de tom u kôron ishu la, ve dondo sha a na. Ve zende ken Galilia cii, ve lu pasen kwagh u Tartor u Yehova. Ve pase ken ushinagoge man ken ityembekasua man sha ugodobi. Ior kpishi dondo sha Yesu, ve lu zan hanma ijiir i Yesu lu zan cii. Yange i ungwa kwagh u Yesu hanma ijiir cii, kua ajiir a icaa je kpaa, er tar u Shiria nahan.

Shighe karen yô, Yesu na mbadondon un mbagenev tahav mbu been ior iangev shi dughun ujijingi mba bov. Mbagenev dondo sha a na, er lu pasen kwagh zenden sha ugeri mba vesen man mba kiriki la. Kasev mba jighjigh mbagenev lu nengen sha Yesu kua mbahenen nav doo doo. Kasev mba shon yô, lu Maria Magedalena man Yohana man Susana kua mbagenev.

Yesu tesen mbahenen nav tom u pasen kwagh la been cii yô, a kaa ér ve due ve za pase kwagh. Er ve lu zenden pasen kwagh ken Galilia la, ior kpishi hingir mbahenen, shi i er ve batisema. Ior mba yange ve soo u hingir mbahenen la ngee je, Yesu ôr kwagh ve kaa ér mba inja er ka sule u u via i kuma u sundan nahan. A kaa ér: ‘Er nen msen, sôn nen Yehova a seer mba eren tom u sundan, ve sunda iyiav.’ Shighe karen yô, Yesu tsua mbahenen nav mbagenev 70, tindi ve uhar uhar ér ve zende ve  pase kwagh hen tiôntar u Yudia la cii. Yange ve pase hanma inja or cii kwagh u Tartor. Mbahenen mbara mba za hiden yô, lu ve toon toon u ôron Yesu akaa a ve tagher a mi yô. Gbenda lu u Diabolo una yange tom u pasen kwagh la ga.

Yesu yange er hanma kwagh u aluer un va hide un yem sha kpa, mbahenen nav vea za hemen u eren tom u hange hange ne yô. A kaa a ve ér: ‘Pase nen kwagh i tser tar. Tesen nen ior Mkaanem ma Aôndo shi eren nen ve batisema.’