Yema tshitshɛ l’ɔkɔngɔ wa batisimu kande, Yeso akatatɛ nsambisha ate: ‘Diolelo diaki Nzambi diaya suke.’ Ambeki ande wakatawoyelaka etena kakandakindjakindjaka Ngalileya ndo Judeya y’otondo. Etena kakakalola Yeso la Nazarɛtɛ osomba wakandotɔ, nde akatshu lo shinangɔnga, akafola wɔɔmbɔ w’Isaya ndo akadia la dui dia wolo ate: ‘Jehowa akambisha nyuma k’ekila dia dimi nsambisha lokumu l’ɔlɔlɔ.’ Kakɔna kakalembetshiya dui sɔ? Diɔ diakɛnya dia kaanga mbakalange anto mɛna Yeso asala ahindo, ɔkɔkɔ woleki wakandalongola nyuma k’ekila aki dia nsambisha lokumu l’ɔlɔlɔ. Ko nde akatɛ ampokami ande ate: ‘Prɔfɛsiya kɛsɔ kambokotshama ɛlɔ kɛnɛ.’

Oma laasɔ, Yeso akatshu lo Ndjale ka Ngalileya, lɛnɛ akandatohomana la ambeki ande anɛi waki amundji wa nse. Nde akawaelɛ lo mbuta ate: ‘Nyoye ko dimi layonyetɛ amundji w’anto.’ Ambeki akɔ waki: Petero, Andɛlɛ, Jakɔba ndo Joani. Vɔ wakatshike mbala kakɔ ɔtɔi olimu awɔ wa minda nse ko wakoyele. Vɔ wakakindjakindja Ngalileya k’otondo watasambisha awui wendana la Diolelo dia Jehowa. Vɔ wakasambisha lo toshinangɔnga, lo mingu ndo lo toshinga. Olui a woke w’anto wakatawayelaka l’ahole tshɛ wakawatshɔka. Nkumu yendana la Yeso yakadiangana l’ahole tshɛ polo ndo la Suriya.

L’edjedja ka wonya, Yeso akasha ambeki ande amɔtshi wolo wa nkɔnɔla anto ndo wa ntondja ɛdiɛngɛ. Akina wakatshu la nde etena kakandatasambishaka lo osomba la osomba ndo lo ngelo la ngelo. Wamato amɔtshi waki la kɔlamelo, mbidja ndo Mariya w’ose Mangadala, Joana, Suzana ndo akina wakatakimanyiyaka Yeso nde la ambeki ande.

L’ɔkɔngɔ wa nde ndowanya ambeki ande, Yeso akaatome dia tosambisha. Etena kakawatetetaka lo Ngalileya k’otondo, anto akina efula wakakome ambeki ndo wakabatizama. Efula wakalange nkoma ambeki wa Yeso, diakɔ diele Yeso akawaɛdika la ekambɔ kele diangɔ dia lɔkɔ diaki suke la minama. Nde akate ate: ‘Nyɔlɔmbɛ Jehowa dia nyomotoma ekambi ekina lo dinela.’  L’ɔkɔngɔ diko, nde akasɔnɛ ambeki 70 ko akaatome ahende ahende dia tosambisha lo Judeya y’otondo. Vɔ waketsha weho w’anto tshɛ awui wendana la Diolelo. Etena kakakalola ambeki ande, vɔ wakalomɔlomɔ dia mbutɛ Yeso kɛnɛ kakete. Ndooko kakakoke Diabolo nsala dia memɛ olimu w’esambishelo.

Yeso akayashikikɛ dia ambeki ande wayotetemala la nsala olimu w’ohomba efula ɔsɔ l’ɔkɔngɔ wa nde nkalola l’olongo. Nde akawatɛ ate: ‘Nyosambisha lokumu l’ɔlɔlɔ lo nkɛtɛ k’otondo. Nyetsha anto awui wendana l’Ɔtɛkɛta wa Nzambi ndo nyaabatize.’