Taimi nounou mei he papitaiso ʻa Sīsuú, naʻe kamata ke ne malanga: ‘ʻOku ofi ʻa e Puleʻanga ʻo e ʻOtuá.’ Naʻe muimui ʻiate ia ʻa e kau ākongá ʻi heʻene fononga takai holo ʻi Kāleli mo Siuteá. ʻI he foki ʻa Sīsū ki hono kolo ko Nāsaletí, naʻá ne ʻalu ki he sinakoké, ʻo ne fakaava ʻa e takainga tohi ʻa ʻAiseá, peá ne lau leʻo-lahi: ‘Kuo ʻomai ʻe Sihova kiate au ʻa e laumālie māʻoniʻoní koeʻuhi ke u lava ʻo malangaʻi ʻa e ongoongo leleí.’ Naʻe ʻuhinga ia ki he hā? Naʻe ʻuhinga iá neongo naʻe loto ʻa e kakaí ke nau sio kia Sīsū ʻokú ne fakahoko ha ngaahi mana, ko e ʻuhinga tefito naʻá ne maʻu ai ʻa e laumālie māʻoniʻoní ke ne malangaʻi ʻa e ongoongo leleí. Naʻá ne tala ange leva ki heʻene kau fanongó: ‘Kuo hoko ʻi he ʻahó ni ʻa e kikite ko ení.’

Ko hono hokó, naʻe ʻalu ʻa Sīsū ki he Tahi Kālelí, ʻa ia naʻá ne fetaulaki ai mo e toko fā ʻo ʻene kau ākongá, ʻa ia ko e kau toutai. Naʻá ne fakaafeʻi kinautolu, ʻo ne pehē: ‘Mou haʻu mo au, pea te u ngaohi kimoutolu ke mou hoko ko e kau toutai tangata.’ Ko kinautolú ko Pita, ʻAnitelū, Sēmisi, pea mo Sione. Naʻa nau liʻaki he taimi pē ko iá ʻenau pisinisi toutaí pea nau muimui ʻiate ia. Naʻa nau fononga holo ʻi Kāleli kotoa, ʻo malanga fekauʻaki mo e Puleʻanga ʻo e ʻOtuá. Naʻa nau malanga ʻi he ngaahi sinakoké, ʻi he ngaahi māketí, pea ʻi he ngaahi halá. Naʻe muimui ha fuʻu kakai ʻiate kinautolu ki ha feituʻu pē naʻa nau ʻalu ki ai. Naʻe mafola ki he feituʻu kotoa pē ʻa e ongoongo fekauʻaki mo Sīsuú, ʻo aʻu ki Sīlia.

Naʻe ʻoange ʻi he taimi ʻe taha ʻe Sīsū ki he niʻihi ʻo hono kau muimuí ʻa e mālohi ke nau fakamoʻui ʻa e kakaí pea ke nau tuli ʻa e fanga tēmenioó. Naʻá ne ʻalu mo e niʻihi ʻi heʻene malanga ʻi he kolo lalahi ki he kolo lalahi pea ʻi he kolo iiki ki he kolo iiki. Naʻe tokangaʻi ʻa Sīsū mo hono kau muimuí ʻe he kau fefine faitōnunga tokolahi, naʻe kau ai ʻa Mele Makitala, Sōana, Sūsana, mo e niʻihi kehe.

Hili ʻene akoʻi ʻa ʻene kau ākongá, naʻe fekauʻi atu kinautolu ʻe Sīsū ke nau malanga. ʻI heʻenau fononga ʻi he kotoa ʻo Kālelí, naʻe hoko ai ko e kau ākonga ʻa e tokolahi kehe pea nau papitaiso. Naʻe loto ʻa e fuʻu tokolahi ke nau hoko ko e kau ākonga ʻo fakahoa ai ʻe Sīsū kinautolu ki ha ngoue naʻe teu ke utu. Naʻá ne pehē: ‘Lotu kia Sihova ke ne fekauʻi mai ha kau ngāue tokolahi ange ke utu ʻa e ngoué.’ Naʻá ne fili ki mui ai ʻa e toko 70 ʻo ʻene kau  ākongá ʻo ne fekauʻi atu kinautolu ke nau malanga tautau toko ua ʻi Siutea kotoa. Naʻa nau akoʻi ʻa e kakai kehekehe fekauʻaki mo e Puleʻangá. ʻI he foki mai ʻa e kau ākongá, naʻa nau fiefia ke tala kia Sīsū ʻa e meʻa naʻe hokó. Naʻe ʻikai ha meʻa naʻe lava ke fai ʻe he Tēvoló ke taʻofiʻaki ʻa e ngāue fakamalangá.

Naʻe fakapapauʻi ʻe Sīsū ʻe hokohoko atu hono fai ʻe heʻene kau ākongá ʻa e ngāue mahuʻinga ko ení hili ʻene foki ki hēvaní. Naʻá ne tala kiate kinautolu: ‘Mou malangaʻi ʻa e ongoongo leleí ʻi he kotoa ʻo e māmaní. Akoʻi ʻa e kakaí fekauʻaki mo e Folofola ʻa e ʻOtuá, pea papitaiso kinautolu.’