Kuzwa chiindi naakabbabbatizigwa, Jesu wakakambawuka kati: ‘Bwaami bwaLeza bwaba afwiifwi.’ Basikwiiya bakamutobela chiindi naakali kukambawuka kuGalilaya akuJudaya. Jesu naakabweeda kulimbabo kuNazareta, wakiinka kuchikombelo alimwi wakajula bbuku lyamusinsimi Isaya akubalila aajulu majwi ati: ‘Muuya waJehova wandipa manguzu akuti ndikambawuke makani mabotu.’ Eezi zyakali kwaambaanzi? Zyakali kwaamba kuti Jesu wakatambula muuya uusalala kuti akambawuke makani mabotu nikuba kuti wakali kuchita malele. Wakabuzya bantu kuti: ‘Sunu lugwalo oolu lwazuzikizigwa.’

Kuzwa waawo, Jesu wakayinka kuLwizi lwaGalilaya, alimwi nkuko nkwaakajana basikuzuba nswi bane bakazooba basikwiiya bakwe. Wakabayita kati: ‘Amunditobele ndiyoomuchita basikuzuba bantu.’ Mazina aabo nguPetro, Andreya, Jakkobo aJohane. Bakasiya bbizinesi lyakuzuba nswi mpawo bakamutobela. Bakeenda muGalilaya moonse kabakambawuka atala aBwaami bwaJehova. Bakali kukambawuka kuzikombelo, kumisika amumigwagwa. Bantu biingi bakali kubatobela kufumbwa nkubaya. Makani ali atala aJesu akamvwigwa kumasena miingi kuswaanizya akuSiriya yakali kule loko.

Mukuya kwachiindi, Jesu wakapa bamwi batobeli bakwe manguzu akuponia bachiswa akutanda madimoni. Bamwi bakali kweenda anguwe naakali kukambawuka mumyuunzi isiyene-siyene. Bakayintu bakali kusyomeka baswaanizya Mariya Magadalene, Johana, Susana abamwi bakagwasilizya Jesu abatobeli bakwe.

Naakayiisya basikwiiya bakwe, Jesu wakabatuma kuti bakakambawuke. Nibakali kukambawuka kuGalilaya, bantu biingi bakaba basikwiiya alimwi bakabbabbatizigwa. Bantu biingi bakali kuyanda kuba basikwiiya zyakuti Jesu wakabakozyanisya amuunda uyanda kutebulwa. Wakati: ‘Amukumbile Jehova kuti atume batebuzi biingi kukutebula kwakwe.’ Mukuya kwachiindi, wakasala basikwiiya bali 70 alimwi wakabatuma kabali babili-babili kuti bakakambawuke  kuJudaya. Bakayiisya bantu basiyene-siyene makani ali atala aBwaami. Nibakaboola, basikwiiya bakali achiyandisyo chakubuzya Jesu zyoonse zyakachitikide. Taakwe chintu chakali kukonzya kuchitwa aDyabbulosi kuti alesye mulimu wakukambawuka.

Jesu wakali kuyanda kuti basikwiiya bakwe bayinkilile kunembo kabachita mulimu ooyu uuyandikana, ikuti wabweeda kujulu. Wakababuzya kuti: ‘Mweelede kukambawuka makani mabotu munyika yoonse. Muyiisye bantu Jwi lyaLeza alimwi mubabbabbatizye.’