Bihain liklik long Jisas i baptais, em i kirap long autim tok: ‘Kingdom Bilong God i kam klostu pinis.’ Ol disaipel i bihainim Jisas taim em i go raun long Galili na Judia. Taim Jisas i go bek long asples bilong em long Nasaret, em i go long sinagog, opim skrol bilong Aisaia, na ritim long strongpela nek: ‘Jehova i givim mi holi spirit, olsem na mi inap autim gutnius.’ Wanem mining bilong dispela tok? Dispela i makim olsem namba 1 risen na Jisas i kisim holi spirit em long autim gutnius, maski ol man i laik lukim em i wokim ol mirakel. Bihain em i tokim ol man i harim tok: ‘Tude dispela tok profet i kamap tru.’

Bihain, Jisas i go long Raunwara Galili, long dispela hap em i bungim 4-pela disaipel bilong em, ol i man bilong kisim pis. Em i singautim ol na tok: ‘Kam bihainim mi, bai mi mekim yupela i kamap ol man bilong kisim ol manmeri.’ Ol dispela disaipel em Pita, Andru, Jems, na Jon. Kwiktaim ol i lusim wok bisnis bilong kisim pis na bihainim em. Ol i go long olgeta hap bilong Galili, na autim tok long Kingdom Bilong Jehova. Ol i autim tok long ol sinagog, maket ples, na ol strit. Bikpela lain manmeri i bihainim ol long wanem hap ol i go long en. Stori bilong Jisas i go long olgeta hap, na i go longwe inap long Siria tu.

Bihain, Jisas i givim strong long sampela disaipel long oraitim sik bilong ol manmeri na rausim ol dimon. Na ol narapela i bihainim em taim em i autim tok long ol bikpela na liklik taun. Planti bilipmeri, na tu, Maria Makdala, Joana, Susana, na ol narapela i lukautim Jisas na ol disaipel bilong em.

Bihain long Jisas i trenim ol disaipel, em i salim ol i go long autim tok. Ol i autim tok long olgeta hap bilong Galili, na planti man i kamap disaipel na kisim baptais. Planti man i laik kamap disaipel, olsem na Jisas i tok ol i olsem kaikai i mau pinis na i redi long kisim. Em i tok: ‘Beten long Jehova i salim sampela wokman moa bilong bungim kaikai.’ Bihain em i makim 70 disaipel na salim  ol i go 2-pela 2-pela long autim tok long olgeta hap bilong Judia. Ol i skulim olgeta kain man long Kingdom. Taim ol disaipel i kam bek, ol i amamas long tokim Jisas long ol samting i kamap. Devil i no inap mekim wanpela samting long stopim wok autim tok.

Jisas i mekim olgeta samting na bai ol disaipel bilong em i mekim yet dispela bikpela wok bihain long em i go long heven. Em i tokim ol: ‘Autim gutnius long olgeta hap bilong graun. Skulim ol man long Tok Bilong God, na baptaisim ol.’