Hanyuma y’okubatizibwa, Yesu akatandika kutebeza nagamba ati: ‘Obukama bwa Ruhanga buli haihi.’ Abegeswa be bakamuhondera kugenda Galiraya n’omu Buyudaaya. Yesu obuyagarukire owabu Nazalesi, akagenda omu iso’rokaniro, yatandika kusoma omuzingo gwa nabbi Isaya omu iraka erikooto ati: ‘Yahwe ampaire omwoyo ogurukwera nukwo nsobole kutebeza amakuru amarungi.’ Kinu kikaba nikimanyisa ki? Ensonga enkuru habwaki Yesu yatungire omwoyo ogurukwera ekaba eri, kutebeza n’obukiraaba ngu abantu bakaba nibagonza kurora Yesu nakora eby’amahano. Hanyuma akagambira abakaba nibamuhuliiriza ati: ‘Obunabbi bunu buhikiriire kiro kinu.’

Hanyuma, Yesu akagenda ha Nyanja eya Galiraya nambere yasangire abegeswa be bbana abakaba bali basohi. Akabaraaliza yabagambira ati: ‘Mumpondere, ninyija kubafoora basohi b’abantu.’ Abegeswa banu nubo Petero, Andereya, Yakobo, hamu na Yohana. Aho n’aho bakaleka omulimo gwabo ogw’okusoha bahondera Yesu. Bakagenda Galiraya nibatebeza Obukama bwa Yahwe. Bakatebeza omu maso’rokaniro, omu butale, n’omu bibuga. Abantu baingi babahonderaga hoona nambere bagendaga. Amakuru agarukukwata hali Yesu gakararanga hoona n’okuhika Aramu.

Hanyuma y’akasumi, Yesu akaheereza abegeswa be amaani ag’okusobora kukiza abantu n’okubiinga emizimu. Abandi bakamuhondera obwakaba natebeza omu bibuga hamu n’omu byaro. Abakazi abesigwa nka Malyamu Magadelene, Yoana, Susana, hamu n’abandi bakarolerra Yesu n’abegeswa be.

Obuyamazire kutendeka abegeswa be, Yesu akabatuma bagende batebeze. Obu bagenzere nibatebeza omu Galiraya yoona, baingi bakafooka begeswa kandi babatizibwa. Baingi bakagonza kufooka abegeswa kandi enu niyo ensonga habwaki Yesu yabalengesaniize n’omusiri ogukaba guhikire kugesa. Akabagambira ati: ‘Musabe Yahwe atume abakozi abarukukiraho ab’okugesa.’ Hanyuma, Yesu akakoma abegeswa 70 kandi yabatuma babiri babiri kugenda kutebeza omu  Buyudaaya yoona. Bakegesa abantu ba buli mulingo, ebintu ebirukukwata ha Bukama bwa Ruhanga. Abegeswa obu bagarukire, bakagambira Yesu eki baali bakozere. Setani akaba atarukusobora kutanga omulimo gunu ogw’okutebeza.

Yesu atakagarukire omu iguru akatendeka abegeswa be nukwo basobole kugumizaamu n’omulimo ogw’okutebeza. Akabagambira ati: ‘Mutebeze amakuru amarungi omu nsi yoona. Mwegese abantu ekigambo kya Ruhanga kandi mubabatize.’