Иисус сугга суктуруп алгаш, Бурганның Чагыргазы чоокшулап келген деп суртаалдап эгелээн. Ол өөреникчилери-биле Галилеяга, Иудеяга суртаалдап турган. Оон Иисус төрээн хоорайы Назаретче чедип келгеш, синагогага Исайя медээчиниң дүрүг-номун ажыткаш: «Иегова меңээ ыдыктыг сүлдени буянныг медээни суртаалдазын дээш берген» — деп сөстерни ыыткыр номчуп эгелээн. Ол сөстерниң утказы кандыгыл? Иисустуң хуулгаазыннарын улус көрүксээр турган. Ынчалза-даа ыдыктыг сүлдени алган кол чылдагааны — буянныг медээни суртаалдаары турган. Иисус дүрүг-номдан ол сөстерни номчааш: «Бо өттүр билген медеглел бөгүн күүсеттинген» — дээн.

Оон Иисус Галилея далайже чорупкан. Ол аңаа дөрт балыкчыга таваржы берген, олар соонда ооң өөреникчилери апарган. Ол оларга мынча дээн: «Мээң-биле кады бараалыңар, мен силерни кижилер тывыкчылары кылып каар мен». Оларның аттарын Пётр, Андрей, Иаков, Иоанн дээр. Олар балыктаар ажылын каггаш, ооң өөреникчилери апарган. Олар Иисус-биле кады Бурганның Чагыргазының дугайында улуска чугаалап, бүдүн Галилеяны кезипкен. Олар синагогаларга, базаарларга, кудумчуларга суртаалдаарга, хөй улус оларны эдерип чораан. Иисустуң дугайында медээ чер бүрүзүнге, безин ырак Сирияга, дыңналы берген.

Кезек үе эрткенде, Иисус чамдык өөреникчилеринге аарыгларны экиртир, буктарны ойладыр күштү берген. А өскелери-биле ол хоорайларга, суурларга суртаалдап турган. Ооң өөреникчилериниң аразынга Мария Магдалина, Иоанна, Сусанна дээр херээжен улус база турган. Олар Иисус дээш база ооң-биле кады чораан улус дээш сагыш човап турган.

Иисус өөреникчилерин өөреткеш, суртаалдадып чоргузупкан. Галилеяда хөй улус ооң өөреникчилери апаргаш, сугга суктуруп алган. Күзелдиг улус хөй боорга, Иисус оларны дүжүдү бышкан шөлге дөмейлээн. Иисус мынча дээн: «Ол дүжүттү чыып алыр дээш, хөй ажылчыннарны чоргузар кылдыр Иеговадан дилеңер». Соонда  ол 70 өөреникчини шилип алгаш, бүгү Иудеяга Чагырга дугайында ийи-ийи кылдыр суртаалдадып чоргузупкан. Өөреникчилери суртаалының дугайында Иисуска өөрүшкүлүг чугаалаар чораан. Эрлик суртаал ажылынга шаптыктап чадап каан деп моон көскү.

Ол дээрже чоруптарга безин, өөреникчилери суртаал ажылын уламчылаарын Иисус күзеп турган. Ол оларга: «Бо буянныг медээни бүгү делегейге суртаалдаңар. Улуска Бурганның Сөзүн билип алырынга база сугга суктуруп алырынга дузалаңар» — деп чугаалаан.