Kʼalal kʼaxemix jtebuk tiempo-a te la yichʼ jaʼ te Jesuse kaj ta scholel skʼop Dios: “Nopolix te Wentainel yuʼun te Diose”. Te Jesús sok te jnopojeletik yuʼune la yoklinik te Galilea sok Judea. Te kʼalal sujt ta Nazaret te Jesús te jaʼ slumale, bajtʼ ta sinagoga, la sjam te balbil jun yuʼun Isaías sok tulan la skʼopon: “Te Jehová yakʼojbon te schʼul espiritu swenta ya jcholbey skʼoplal te lek yachʼil kʼop yuʼune”. ¿Bin la skʼan la yal? Te ants winiketik la skʼan yilik te milagroetik yuʼun te Jesús. Pero ma jaʼuknax la yichʼ akʼbeyel chʼul espiritu yuʼun ya spas milagroetik. Te bin mukʼxan skʼoplal jaʼ te ya yalbey skʼoplal te lek yachʼil kʼop yuʼun te Wentainele. Ta slajibal, la yaltiklanbey te machʼatik yakik ta schʼamel yaʼiyike: “Yoʼtik ya xkʼot ta pasel te albilkʼop ini”.

Ta patil, te Jesús bajtʼ ta mar yuʼun Galilea. Tey la yil-a te chantul jnopojeletik yuʼun te jaʼ jtsakchayetik sok la yaltiklanbey: “Laʼik tʼunawonik ya kakʼex ta jtsob ants winiketik”. Te winiketik-abi jaʼ te Pedro, Andrés, Santiago sok Juan. Ta oranax la yijkʼitayik te yaʼtelik sok la stʼunik te Jesuse. La yoklinik te Galilea ta scholel te Wentainel yuʼun te Jehová. La scholik ta sinagogaetik, ta merkadoetik sok ta kayeetik. Bayal ants winiketik tʼunotik yuʼun chikan te banti bajtʼike. Ta bayuk chiknaj skʼoplal te Jesús, jaʼnix jich ta Siria te namal aye.

Te kʼalal kʼax te kʼajkʼale, te Jesús la yakʼbey yuʼel chaʼoxtul jnopojeletik swenta ya slekubtesik jchameletik sok ya slokʼesik chopol espirituetik. Ay yantik te la sjokinik te Jesús ta scholel skʼop Dios ta jujunpam lum sok ta mukʼul lumetik. Jaʼnix jich ay jtsojb antsetik te jun yoʼtan aʼtejik ta stojol Jesús sok te jnopojeletik yuʼune. Tey ay-a te María Magdalena, Juana, Susana sok yantikxan.

Te kʼalal spʼijubtesojix-a te jnopojeletik yuʼun te Jesús la stikunlan ta scholel skʼop Dios. Kʼalal yakik ta yoklinel-a te Galilea bayal machʼatik ochik ta jnopojel yuʼun te Jesús sok la yichʼik jaʼ. Ay yantik te la stʼunik te Jesús, jaʼ yuʼun la yal te pajal kʼoemik sok te lumkʼinal te yorailix te ya yichʼ tsobel te awal tsʼunubile. Jich la yal: “Kʼoponaik te Jehová yuʼun ya stikun j-aʼteletik ta stsobel te awal tsʼunubile”. Ta patil bael, la stsatiklan 70 ta tul jnopojeletik sok la stikunlan ta cheʼcheb ta scholel skʼop Dios ta  spamal Judea. La scholbeyik skʼoplal te Wentainel yuʼun te Dios ta stojol spisil ants winiketik. Te kʼalal sujtik tale oranax la skʼan scholbeyik yaʼiy te Jesús te bin la spasike. Te Satanás maʼyuk bin juʼ yuʼun spasel ta skomel te scholel skʼop Diose.

Te kʼalal mato sujt bael ta chʼulchan-a te Jesús la schajpan jilel spisil swenta ya spasikxan te aʼtelil te mukʼ skʼoplal te jnopojeletike. La yaltiklanbey: “Cholbeyaik skʼoplal te lek yachʼil kʼop yuʼun te Wentainel yuʼun te Dios ta swolol Balumilal. Akʼaik ta nopel te sKʼop Dios sok akʼbeyaik yichʼ jaʼ te ants winiketike”.