Noke yepapatiso lia Yesu ka pa pitile otembo yalua, eye wa fetika oku kunda hati: ‘Usoma wa Suku u kasi ocipepi.’ Olondonge vio kuama osimbu a kala oku linga ungende ko Galilea kuenda ko Yudea. Eci Yesu a tiukila ko Nasara olupale a citiwila, eye wa enda vosunangonga, wa yikula ociña ca Isaya kuenje wa tanga lolukandi hati: ‘Yehova wa nyiha espiritu sandu oco ndi kunde olondaka viwa.’ Eci ci lomboloka nye? Ci lomboloka okuti ndaño omanu va yonguile okuti Yesu o talavaya lespiritu sandu oco a linge ovikomo, pole, esunga lia velapo lieci a tambuila espiritu sandu, oku kunda olondaka viwa Viusoma. Noke wa sapuila olonjeveleli viaye hati: ‘Etaili ocitumasuku eci ca tẽlisiwa.’

Kuenje Yesu wa enda Kokalunga ko Galilea, kuna a sanga olondonge viaye vikuãla okuti va kala vakuakupipa ombisi. Eye wa va laleka poku popia hati: ‘Ñuami kuenje ndu lingisi anyanga vomanu.’ Olondonge viaco vievi, Petulu, Andereu, Tiago kuenda Yoano. Vepuluvi liaco, va siapo olomĩlu viavo vioku pipa kuenje vo kuama. Noke va enda ko Galilea yosi oku kunda eci catiamẽla Kusoma wa Yehova. Ovo va kundila volosunangonga, povitanda kuenda volokololo. Owiñi walua wa va kuama kuosi va enda. Esapulo liatiamẽla ku Yesu lia lisanduila kolonepa viosi toke muẽle ko Suria.

Vokuenda kuotembo, Yesu wa eca ku vamue pokati kolondonge viaye unene woku sakula olombei kuenda woku tundisa olondele. Vakuavo va endaenda kumue laye oku kunda volupale lolupale kuenda vimbo limbo. Etendelo limue liakãi vakuekolelo oku kongelamo Maria Magadala, Yoana, Susuana kuenda akãi vakuavo, va tata Yesu kumue lolondonge viaye.

Noke yoku pindisa olondonge viaye, Yesu wa va tuma oku kunda. Osimbu va kala oku kundila kolonepa viosi vio ko Galilea, omanu valua va linga olondonge kuenje va papatisiwa. Omo okuti omanu valua va yonguile oku linga olondonge, Yesu wa va sokisa lepia limue okuti lia yelela ale oku ungula. Eye wa popia hati: ‘Likutilili ku Yehova oco a tume olonalavayi koku ungula.’ Yesu noke wa nõla 70 pokati kolondonge viaye kuenje wa vi tuma vivali vivali oco vi kundile  ko Yudea yosi. Ovo va longisa omanu vosi eci catiamẽla Kusoma. Eci olondonge via tiuka via kuata esanju lioku sapuila Yesu ovina via pita lavo. Lacimue satana a ponduile oku linga oco a tateke upange woku kunda.

Yesu wa kolelele okuti, olondonge viaye via ponduile oku amamako oku linga upange waco u kuete esilivilo lia velapo, noke yoku tiukila kilu. Eye wa va sapuila hati: ‘Kundi olondaka viwa koluali luosi. Longisi omanu eci catiamẽla Kondaka ya Suku kuenda va papatisi.’