Musi o no lovhedzwa, Yesu o thoma u huwelela a ri: ‘Muvhuso wa Mudzimu u tsini.’ Vhafunziwa vho mu tevhela musi a tshi ya Galilea na Yudea. Musi Yesu a tshi vhuyelela muḓini wahawe wa Nazareta, o ya tshikoloni, a vula maṅwalo a Yesaya, a a vhalela nṱha a ri: ‘Yehova o nṋea muya mukhethwa u itela uri ndi kone u huwelela mafhungo maḓifha.’ Zwenezwo zwo vha zwi tshi amba mini? Zwo vha zwi tshi amba uri naho vhathu vho vha vha tshi ṱoḓa u vhona Yesu a tshi ita maḓembe, tshiitisi tshi hulwane tsha uri a ṋewe muya mukhethwa tsho vha tshi tsha uri a kone u huwelele mafhungo maḓifha. O mbo ḓi vhudza vhathetshelesi vhawe a ri: ‘Ṋamusi holwu luṅwalo lwo ḓadzea.’

Yesu a ya lwanzheni lwa Galilea, henefho a ṱangana na vhafunziwa vhawe vhaṋa, vhe vha vha vhe vharei vha khovhe. O vha ramba a ri: “Ntevheleni, ndi ḓo ni ita vharei vha vhathu.” Ho vha hu Petro, Andrea, Yakobo na Yohane. Vho mbo ḓi ṱavhanya vha litsha bindu ḽavho ḽa u rea khovhe nahone vha mu tevhela. Vho tshimbila ḽoṱhe ḽa Galilea, vha tshi huwelela nga ha Muvhuso wa Mudzimu. Vho huwelela zwikoloni, mimakete na zwiṱaraṱani. Gogo ḽa vha tevhela hoṱhe he vha ya hone. Mafhungo nga ha Yesu a ḓivhiwa hoṱhe, u swika na ngei Siria.

Nga u ya ha tshifhinga, Yesu o ṋea vhaṅwe vhatevheli vhawe maanḓa a u fhodza vhathu na u pandela madimoni. Vhaṅwe vho ṱuwa nae musi a tshi yo huwelele dziḓoroboni na miḓini yo fhamba-fhambanaho. Vhunzhi ha vhafumakadzi vha fulufhedzeaho, u katela Maria Magdalena, Yohana, Susana na vhaṅwe, vho ṱhogomela Yesu na vhatevheli vhawe.

Musi o no gudisa vhafunziwa vhawe, Yesu o vha ruma uri vha yo huwelela. Musi vha tshi khou tshimbila ḽoṱhe ḽa Galilea, vhaṅwe vhanzhi vho mbo ḓi vha vhafunziwa nahone vha lovhedzwa. Vhathu vhanzhi vho vha vha tshi ṱoḓa u vha vhafunziwa lwe Yesu a vha fanyisa na tsimu yo lugelaho u kaṋiwa. O ri: ‘Rabelani Yehova uri a rumele vhaṅwe vhashumi uri vha ḓe vha kaṋe.’ Nga murahu a khetha vhafunziwa vha 70 nahone a vha ruma nga vhavhili uri vha yo huwelela u mona na ḽa Yudea. Vho funza vhathu vha mifuda yoṱhe nga  ha Muvhuso. Musi vhafunziwa vha tshi vhuya, vho vha vho takala vhukuma u vhudza Yesu zwe zwa itea. Ho vha hu si na zwe Diabolo a vha a tshi nga zwi ita u itela u thivhela mushumo wa u huwelela.

Yesu o ita vhungoho ha uri vhafunziwa vhawe vha bvele phanḓa na u ita wonoyu mushumo wa ndeme musi o no vhuyelela ṱaḓulu. O ri khavho: ‘Huwelelani mafhungo maḓifha kha ḽifhasi ḽoṱhe. Gudisani vhathu nga ha Ipfi ḽa Mudzimu, nahone ni vha lovhedze.’