Waray pag-iha katapos han bawtismo ni Jesus, nagtikang hiya magsangyaw: ‘An Ginhadian han Dios hirani na.’ An mga disipulo nagsinunod samtang nagsasangyaw hiya ha bug-os nga Galilea ngan Judea. Pagbalik ni Jesus ha Nazaret, an iya gindak-an nga syudad, kumadto hiya ha sinagoga, gin-abrihan an linukot nga basahon ni Isaias, ngan ginbasa ha daku nga tingog: ‘Gintagan ako ni Jehova hin baraan nga espiritu basi maisangyaw ko an maopay nga sumat.’ Ano an karuyag sidngon hito? Karuyag sidngon, bisan kon karuyag makita han mga tawo nga nagbubuhat hi Jesus hin mga milagro, an pagsangyaw han maopay nga sumat an siyahan nga rason nga nakakarawat hiya hin baraan nga espiritu. Tapos, nagsiring hiya: ‘Yana nga adlaw natuman ini nga tagna.’

Kahuman, kinadto hi Jesus ha Dagat han Galilea. Nakita niya an upat niya nga disipulo nga parapangisda​—hira Pedro, Andres, Santiago, ngan Juan. Iya hira gin-imbitar: ‘Sunod kamo ha akon, ngan hihimoon ko kamo nga parapangisda hin mga tawo.’ Ira dayon ginbayaan an ira negosyo nga pagpangisda ngan sinunod ha iya. Ginlibot nira an Galilea basi isangyaw an mahitungod han Ginhadian ni Jehova. Nagsangyaw hira ha mga sinagoga, merkado, ngan mga kalsada. Damu an nagsinunod ha ira diin man hira kumadto. Nagsarang an sumat mahitungod kan Jesus, nakaabot pa ngani ito ha Sirya.

Paglabay han panahon, gintagan ni Jesus hin gahum an iba niya nga sumurunod basi makatambal ngan makapagawas hin demonyo. An iba inupod samtang nagsasangyaw hiya ha mga syudad ngan mga baryo. May matinumanon nga kababayin-an, upod na hira Maria Magdalena, Juana, Susana, ngan iba pa, nga nag-asikaso kan Jesus ngan ha iya mga sumurunod.

Katapos bansayon ni Jesus an iya mga disipulo, ginsugo niya hira nga magsangyaw. Samtang nagsasangyaw hira ha bug-os nga Galilea, damu an nagin disipulo ngan nabawtismohan. Damu gud an karuyag magin disipulo salit iginpariho hira ni Jesus ha uma nga andam na anihon. Hiya nagsiring: ‘Pag-ampo kamo kan Jehova nga magpadara hin dugang nga  trabahador nga mag-aani ha aranihon.’ Ha urhi, nagpili hiya hin 70 nga disipulo ngan ginpadis-padis hira basi magsangyaw ha bug-os nga Judea. Gintutdoan nira an ngatanan nga klase han tawo mahitungod han Ginhadian. Pagbalik nira, eksayted gud hira pagsumat kan Jesus han nahitabo. Waray gud mapaundang han Yawa an ira pagsangyaw.

Ginsiguro ni Jesus nga maipadayon han iya mga disipulo inin importante nga buruhaton pagbalik niya ha langit. Nagsiring hiya: ‘Isangyaw niyo an maopay nga sumat ha bug-os nga tuna. Tutdui an mga tawo mahitungod han Pulong han Dios, ngan bawtismuhi hira.’