Tafara heliny batisany Jesosy, izy efa nitory edy. Nivolan̈iny: ‘Efa marikitry Fanjakan̈any Zan̈ahary.’ Izy nitety Galilia ndreky Jodia niaraka tamy pianatranany. Izy koa fa nimpody ta Nazareta tany faviany, izy nandeha tamy synagoga, nan̈abian̈a horonambokiny Isaia. Nivakiny mare volan̈a aby ty: ‘Jehovah nan̈amia fan̈ahy masin̈y zaho, baka zaho mahavita mitory vaovao tsara.’ Ino ma dikanizen̈y? Hitory vaovao tsara antony ten̈a nan̈amezan̈a fan̈ahy masin̈y izy, fa tsy han̈ano fahagagan̈a, ndray tianolo mare raha zen̈y. Hoizy baka tio: ‘Niany faminanian̈a zen̈y tanteraka.’

Avio Jesosy nandeha tamy Ranomasin̈y Galilia. Fanojy pianatranany efatra izy tan̈y: Petera, Andrea, Jakoba, ndreky Jaona. Iro io pan̈arato, ke ho Jesosy tamindro: ‘Man̈araha zaho fa anaro hataoko pan̈arato olo.’ Nialandro haratondro, iro nan̈araka Jesosy. Nandeha nitety Galilia iro nitory Fanjakan̈any Jehovah. Iro nitory tamy synagoga, ta bazary, baka io tamy lalan̈a. Nisy olo maro nan̈araka zay tany nimboandro. Nanjary nalaza mare Jesosy, firaka ta Syria tan̈y.

Namiany Jesosy angovo pianatranany sasany, ke nahavita nampajanga olo marary ndreky nan̈adoso demony. Sasany ndraiky nan̈araka Jesosy nitety tanàna nandeha nitory. Nisy man̈angy maro nino Jesosy, an̈isanizen̈y Maria Magdalena ndreky Johana, baka io Sosana. Iro man̈angy aby io nikarakara Jesosy ndreky pianatranany.

Nampianariny Jesosy nitory antsendriky pianatranany, vo nirahiny nandeha nitory. Taminiro nitory ta Galilia tan̈y, naro olo nanjary pianatrany Jesosy, ke natao batisa. Maro olo tihanjary pianatrany Jesosy, mira vary efa matoe, ke ho Jesosy: ‘Mivavaha amy Jehovah, baka izy handefa piasa maro hangala vokatra aby io.’ Nifidy 70 lahy tamy pianatranany izy baka tio, ke iro nirahiny nandeha tsiaroeroe nitory ta Jodia tan̈y. Maro olo nampianarindro momba Fanjakan̈a io. Iro koa fa nimpody, efa tsy din̈indro hitantara tamy Jesosy raha hitandro. Devoly tsy nahavita nisakana fitorian̈a nataondro io foeky.

 Jesosy nan̈iraka pianatranany aby io hanohy asa io, ndray izy efa mimpody andan̈itry an̈y. Izy nivolan̈a: ‘Toria erantany vaovao tsara. Ampianara olo Volan̈a Zan̈ahary, baka io ataova batisa iro.’