Ngbutuko fuo Yesu zi bapatiza, ko atona ka tungusa gupai nga: ‘Ga Mbori Kindo ima mbeda.’ Abawiriki anaapeka fuoko wa ko anaata rogo ringara Gariraya na rogo ringara Yuda. Ho Yesu akaraga tiko ni ku rogo gu gbata i avunguko rogoho nga Gariraya, ko andu ku bambutiria yo ki zaki gu kaikai waraga nga Yesaya, ki gedi gupai du rogoho kuari nga: ‘Yekova ima fu ziazia toro fere tipa mi rengbe ka tungusa wene pangbanga.’ Ginipai gupai re ayugoho? Si nayugo gupai nga wa vura duhe nga aboro aaida ka bi Yesu ko nimangi iˈiriwoapai, gu memepai i afu ziazia toro ti ni angia ka tungusa wene pangbanga. Sidu, ko aya fu agu aboro naadegatuyo fuko wẽ: ‘Areme da gi sangbanebi re ti rengo.’

Fuo gure, Yesu andu ku pati gu Baime yo nga Gariraya yo ko agbia gu gako abawiriki ni biama nangia abaziatĩo. Ko ayambu yo ki ya: ‘Oni ye fuore mi asa roni ni abaziaboro.’ Rimoyo angia Petero, Andarea, Yakoba, na Yoane. Nibasa, i ambu gayo sunge zio atĩo kini peke ko. I ata rogo ringara Gariraya naabaha kini tungusi gu pangbanga nga ga ga Mbori Kindo. I anaatungusapai bambutiria yo, babagaahe yo, na bangiri agene. Rimbasa aboro anaapefuo yo ku rogo agu aba i naandu ku rogoho. Pangbanga Yesu agbandaka rogo aba dunduko da ku Suria yo a.

Fuo bete regbo kusa, Yesu afu ome fu bete apefuoko i nihusi aboro na kini do adaimona. Aguyo anaandu na ko wa ko anaatungusapai rogo abaakporo na rogo agbaria. Dungu ruru adee kodihe na Maria Magadara, Yoana, Susana, gbiati agu akurayo nanaangerafuo Yesu na apefuoko.

Tingbafuo Yesu raba gako abawiriki, ko akedi yo i ndu ka tungusapai. Wa i aata rogo ringara Gariraya, dungu aboro ada ni abawiriki na ki zi bapatiza. Dungu aboro aaida ka da ni abawiriki na Yesu ki ringbisi yo kuti gu ati naima da ba kehe. Ko aya: Oni kpari fu Yekova tipa ko kedi dungu aboro i ke gu ati re.’ Kusa, ko asia gako  abawiriki 70 na ki kedi yo niba ue i nitungusipai rogo ringara Yuda. I ayugupa Kindo fu ngbatunga aboro dunduko. Ho abawiriki akaragatiyo ni, i adu regerege ka pe gupai fu Yesu namangi fuyo. He aadunga ho ka Bakitingbanga amangihe ka rugusa sunge tungusapai te.

Yesu abihe nga si naida gako abawiriki naandu kindi kumbatayo kaa manga gi nyanyakipa sunge re zavura ti gu regbo ko nika karagatiko ku ngbangbaturũ yo. Ko aya fuyo: ‘Oni tungusi wene pangbanga auru kpotosende dunduko. Oni yugu Fugo Mbori fu aboro, na kini bapatizi yo.’