YIGIL 79
Yésu a mboñ ngandak bihélha bi mam
Yésu a bi lo i nkoñ isi inyu legel ñañ nlam u Ane Nyambe. Inyu unda kii Yésu a ga boñ ngéda a ga ba Kiñe, Yéhôva a bi ti nye mbuu mpubi inyu boñ ngandak bihélha bi mam. A bééna ngui i mélés mintén mi makon nwominsôna. To hee homa a bé ke, bakokon ba bé noñ nye le a hôla bo, a bé mélés ki bobasôna. Bôt ba ndim ba bé tehna, bôt ba ndok ba bé noga, bibôk bi bôt bi bé ke, yak i bet mimbuu mimbe mi bé tééñga, ba bé hohlana. To ibale ba bé tis ndigi linjek jé li mbot, ba bé mbôôp. Limut li bé noñ Yésu to hee homa a bé ke. To ngéda a bééna ngôñ i ba nyetama, Yésu a bi yénak bé a buñga mut nye ki nye.
Kel yada, ba bi lona ñambge mut i ndap Yésu a bé a yiine. Ndi bôt ba bi yon i ndap kayéle ba bi la bé jôpna nye. Jon ba bi tôp nyôl, ba suha nye bisu bi Yésu. Ha nyen Yésu a kal mut nu le: ‘Telep bitétéé, u kee.’ Ngéda a bi telep toi, bôt ba hel.
Lisañ lipe, ngéda Yésu a bé jôp nkoñ wada, jôm li bôt li bé kon lô li telep nye haa; ba bôdôl lônd le: ‘A Yésu hôla bés!’ Dilo di, bôt ba lô ba bééna bé kunde i kôôge bôt bape bebee. Yésu a kal bo le ba kee i témpel, kiki Mbén Yéhôva i nkal bôt ba lô le ba nlama boñ ngéda ba mal mbôôp. Kiki ba bé ke, ba mbôôp i njel. Ndi mut lô wada ikété yap a yimbe bañ le a mbôôp, a témb ni mbus i ti Yésu mayéga, a bégés ki Djob. Ikété bo jôm, ndik nyetama nyen a bi ti Yésu mayéga.
Muda wada nu a bi kon 12 nwii, a bé yi ha bé le a’ mbôôp kel yada. Kiki a nok le Yésu a yé ha, a jôp ikété limut li bôt, a lôl Yésu mbus, a tihba linjek jé li mbot. Kunda yada a mbôôp. Ngéda hala a bi bôña, Yésu a bat le: “Njee a ntihba me?” Muda a kon woñi, a ke Yésu bisu, a kal nye maliga. Yésu a lédés nye, a kal nye le: ‘A ngond yem, kee ni nsañ.’
Ñane wada le Yairô a soohe Yésu le: ‘Loo i meeni! Ngond yem i nkon béba ngandak.’ Ndi Yésu nye ngi bol ndap Yairô, hingonda hi wo. Ngéda Yésu a bi bol ndap, a koba bôt ba ñee. Yésu a kal bo le: ‘Ni ee bañ, hingonda hi yé ndik ’ilo.’ A yoñ woo wé, a kal le: “A ngonda, me nkal we le, telep!” Bitéé bilôñi, mañge a telep. Yésu a kal bagwal bé le ba ti nye yom je. Hégda lelaa bagwal bé bi nôgda!
“Nyambe a bi hoo nye ni mbuu mpubi ni lipémba; nu a bé ke homa ni homa a boñok lônge, a mélhak ki bobasôna Nsohop a bé tééñga, inyule Nyambe a bé ni nye.”—Minson mi baôma 10:38
Yak ini i nla lémél we
YÉSU: NJEL, MALIGA, NI NIÑ
“Bibéba gwoñ bi nwéhlana”
Mambe maada Yésu a ñunda le ma yé ipôla nwéhél i bibéba ni i bana mbôô?
YÉSU: NJEL, MALIGA, NI NIÑ
A mbôôp inyule a ntihba mbot Yésu
Yésu a ñunda ngui yé ni konangôo mu kiki a nhôgbaha muda nunu.
YÉSU: NJEL, MALIGA, NI NIÑ
Hingonda hi ntémb i niñ!
Bôt ba nol Yésu hiol kiki a nkal le mañge muda a nwo bé, a yé ndik ke ‘ilo. Kii Yésu a nyi, le bôt bana ba nyi bé?
YÉSU: NJEL, MALIGA, NI NIÑ
Jôm li bakon lô li nkôhna mbôô—wada a nti mayéga
Mut a mbôôp a nti ndigi bé Yésu mayéga, a nti yak mayéga inyu jam lipe.
YÉSU: NJEL, MALIGA, NI NIÑ
Ni imbe ngui yésu a mboñ bihélha bi mam?
Lôknyañ i Yésu i nhoñol le Yésu a nkônd njék.
