Laho paboahon taringot Harajaon ni Debata do Jesus ro tu tano on. Dilehon Jahowa do muse tu ibana tondi parbadia laho mambahen angka mukjizat. On ma na laho diulahon Jesus molo nunga gabe Raja ibana di Harajaon ni Debata. Tudia pe ibana lao, sai ro do angka halak na marsahit. Jala dipamalum ibana do i. Gabe boi ma mangida angka na mapitung, mambege na nengel, mardalan angka na mengkat, jala diusir ma suru-suruan na jahat manang malaikat na jahat sian na kesurupan. Holan ujung baju ni Jesus pe dijama, nunga malum nasida. Tudia pe Jesus lao sai diihuthon angka halak do ibana. Tingki istirahat pe ibana, olo do ibana mangurupi nasida.

Di sada tingki, diboan ma sahalak baoa na mengkat tu inganan ni Jesus marborngin. Alai ndang boi nasida masuk ala godang jolma. Alani i, dibungka nasida ma atap ni jabu i jala dipaturun ma baoa i tu jolo ni Jesus. Dung i didok Jesus ma tu baoa i, ‘Jongjong jala mardalan ma ho.’ Dung mardalan baoa i, heran ma nasida.

Di tingki na asing, lao ma Jesus tu sada huta. Adong ma disi sampulu baoa na marsahit kusta. Sian na dao didok nasida ma, ‘Jesus, pamalum ma hami!’ Tingki i, ndang boi jonok na marsahit kusta tu na asing. Mangihuthon Patik ni Jahowa, ingkon lao do na marsahit kusta tu bagas joro molo nunga malum. Disuru Jesus ma nasida tu bagas joro. Tingki di pardalanan dope, nunga malum nasida. Dung diboto sahalak na marsahit kusta i  naung malum ibana, dijumpangi ma Jesus mandok mauliate. Dipuji ma Debata. Sian sampulu na marsahit kusta i, holan sada do na mandok mauliate.

Adong ma muse sahalak borua na marsahit saleleng 12 taon. Asa malum, sipsip ma ibana laho tu pudi ni Jesus, jala dijama ma ujung ni baju ni Jesus. Dung i malum ma ibana. Gabe disungkun Jesus ma, ‘Ise na manjama bajuku?’ Mabiar ma borua i jala ro ma ibana tu jolo ni Jesus. Diakkui ibana ma sude. Alai didok Jesus ma, ‘Ale boru, mulak ma ho di bagasan dame.’

Adong ma sahalak petugas bagas joro na margoar si Jairus. Ro ma ibana manjumpangi Jesus jala didok ma, ‘Beta jo tu jabuku, naeng mate boruku.’ Alai ndang sahat dope Jesus tu jabu ni si Jairus, nunga mate boruna i. Dung sahat Jesus, diida ibana ma tangis-tangis angka halak na disi dohot keluarga ni si Jairus. Didok Jesus ma, ‘Unang be tangis hamu. Na modom do ibana.’ Dung i ditiop Jesus ma tangan ni boru ni si Jairus i, didok ma, ‘Ale boru, dungo ma ho!’ Dungo ma ibana, jala disuru Jesus ma asa dilehon ibana mangan. Las situtu ma roha ni natua-tuana!