Yésus a nga zu si na a zu kañete mbamba foé ya Éjôé Zambe. Ve Yéhôva a nga ve nye ngule ya bo mesimba asu na, bôte be yem mam a ye bo éyoñ a ye nyoñ éto Njôô. A mbe ngule ya saé aval akon ese. Vôm ase a mbe, minkôkone mi mbe mi za’a be nye, a a mbe a saé mie. A nga kui mindindime mis, a yoé melo mindôndok, a volô miñyeyeme na mi wulu, a vaa fe bôt mimbia minsisim. Ja’a minkôkon mi nga nambe nye ve éwom éyé mi nga bi mvolan. Vôm ase a mbe a kelek, bôte be mbe be tôñe nye. Ja’a éyoñ a mbe a kômbô’ô tabe étam, Yésus a nji bene volô môt éziñ.

Môs éziñ, be nga soo Yésus môt a too ñyemelan a bôô énoñ. Ve be nji be ngule ya bo na a nyiine nda a nga too, amu é mbe njalan a bôt ne lut. Nde be nga tup aloñ andil, a nyiñili môt ate été. Éyoñ Yésus a nga yene jam ete, a nga jô nye na: ‘Tebe’e tetele, ô wulu’u.’ Ane môt a nga tebe, bôte ve zu kam ajô.

Môs ôfe, nté Yésus a mbe a kele’e nlam éziñ, minzezam awôm mi nga tôñe nye mvus mi yôta’ane na: ‘A Yésus, volô’ô bia!’ Melu mete, e mbe étyi na minzezam mi subu bôte bebé. Ane Yésus a nga jô be na be ke tune bebiene temple, aval e mbe ntilan Atiñe Yéhôva asu môt a te saébane zam. Zame jap e nga man nté be mbe zen. Éyoñe wua ya be be a nga  yene na a ntoo mvo’é, a nga bulane mvus na a zu ve Yésus akiba, a na a ve Zambe duma. Nnye étam a nga ve Yésus akiba.

Minga éziñ a mbe a boya mimbu 12 a konôk; a mbe a yii mvolan. Nde a nga kotane Yésus mvus, a nyiine bôt été, a nambe nye éwom éyé. Été été, a nga bo mvo’é. Éyoñ éte Yésus a nga sili na: “Za a te nambe ma?” Akusa bo minga ate a nga ko woñ, a nga zu Yésus ôsu, a kate nye bebela. Yésus a nga jô nye évôvoé été na: ‘A ngo jam, kele’e mvo’é.’

Jaïrus, mone bezimbi éziñ a nga ye’elane Yésus na: ‘Za’a nda jam! Ngo jam ja kon abui.’ Ve mona minga ate a nga wu nté Yésus a mbe zen. Éyoñ Yésus a kuiya nda Jaïrus, a nga koone bôte be yônôk. Ane a nga jô be na: ‘Te mia yôn, mona minga a ne ôyo.’ Nde a nga bi nye wo, a jô na: “Kôlô’ô si a mon!” Ane ngone Jaïrus é nga tabe tetoo; nde Yésus a nga jô bebiaé bé na be ve nye jôme ya di. Tame simesan abime mevak bebiaé bé be nga wôk!