Ñǘbuinti Hesusu ubouagun lun lapurichihani uganu buiti luáguti Larúeihan Bungiu. Lun larufuduni Heowá kaba lan ladüga Hesusu danme larúeihan, ruti sífiri sandu lun lun ladügün milaguru. Gayaraati meha ladügün Hesusu lun hareidagun gürigia ha láubaña furumiñeguarügü sandi. Ñǘdüntiña meha sánditiña lárigi le ñeinhin lumuti lidin, aba méhati ladügün lun hareidagun súngubei. Gayaraahali meha harihin marihintiña, haganbun maganbuntiña luma héibugun méibuguntiña. Láurügü meha haguuruni taru ladaüragun, areidaguátiña. Asagahati giñe sífirigu wuribatiña hawéi gürigia. Súnwandan meha houdin gürigia lárigi Hesusu ani mabugun lumutiña meha luáriua íbini dan le busén lan lerederun lábugua.

Aban weyu, barütiña gürigia aban wügüri le deregüdaali lúgubu tidoun muna to ñein lubéi Hesusu. Siñati meha hebelurun ladüga hiibe gürigia múnada. Ligía aba lubéi hagidarun murusun luéigiñe tábulugu muna lun harariragüdüni sánditi ligía lumoun Hesusu. Lariñaga Hesusu lun wügüri ligía: “Saraba, éibugaba”. Dan le ladügünbalin, aba taweiridun hanigi gürigia.

Amu weyu, dan lebelurunbei Hesusu lidoun aban liraüraü fulasu, aba hararamun diisi gawagutiña lépüra dise luéi, ábati hagúaragun: “Hesusu, íderaguabawa!”. Lidoun meha dan ligía, siñati meha hayarafadun sánditiña ha houn amu gürigia. Ariñagati Hesusu houn wügüriña hagía lun houdin ténpulurugu, kei lariñaguni Lilurudun Heowá lunti lan hadügüni gawagutiña lépüra  lárigiñe hareidagun. Dan le hóudiña lan, aba hareidagun. Dan le líchugunbei aban hádangiñe fe areidaguaali lan, aba lagiribudun íchiga seremei lun Hesusu, alawahalei Bungiu. Ligíarügüñein eteingirei Hesusu hádangiñe.

Barüharu meha aban würi 12 irumu lau sandi ani wéiriti meha tabusenrun tareidagun. Aba tayarafadun lun Hesusu lanagangiñe haganagua saragu gürigia, ábati taguuruni taru ladaüragun. Ouraméme ligía, aba tareidagun. Ábati lálügüdahan Hesusu: “Ka aguurubei nuagu?”. Aba tabuinchun würi tuguya lau anufudei, íbini ítara, ariñaga tumuti sun inarüni lun. Ruti Hesusu gurasu tun lau dimurei burí le: “Beiba lau darangilaü, niráü”.

Ayumuraguati aban gumadan gíriti Hairu lun Hesusu: “Keimoun núbiñe! Hanarimeti tisandi niráü”. Hilatu irahü tuguya lubaragiñe lachülürün Hesusu lúbiñoun Hairu. Dan lachülürünbei, arihati bandi gürigia ayahuaha hama tiduheñu irahü. Lariñaga Hesusu houn: “Mayahuaha humá; tarumugarügüña”. Aba lárügüdüni túhabu, lariñaga: “Irahü, saraba!”. Ouraméme ligía, aba tásaarun. Ábati lariñagun Hesusu houn tagübürigu lun híchugun teigin. Ma funa lueirin hagundan tagübürigu, adián?