Zezi ti vin lo later pour anons bon nouvel lo Rwayonm Bondye. Pour montre sa ki Zezi pou fer ler i Lerwa, Zeova ti donn li lespri sen pour ki i fer mirak. I ti kapab geri nenport maladi. Partou kot i ti ale, dimoun malad ti vin kot li e i ti geri zot tou. Bann aveg ti kapab vwar kler, bann sourd ti kapab tande, bann andikape ti kapab marse e tou bann ki ti anba kontrol bann demon ti ganny libere. Menm si zot ti zis tous lenz Zezi, zot ti ganny geri. Dimoun ti swiv Zezi partou kot i ti ale. Menm ler Zezi ti anvi pas letan li tousel, i pa ti zanmen pous personn.

En zour, dimoun ti anmenn en zonm paralize kot Zezi ti pe reste. Me sa lakaz ti sitan ranpli avek dimoun ki zot pa ti kapab antre. Alor, zot ti fouy en trou dan twa lakaz e zot ti fer desann sa lanmak ki sa zonm ti lo la kot Zezi. Apre, Zezi ti dir sa zonm: ‘Leve e marse.’ Ler i ti fer sa, bann dimoun ti etonnen.

En lot fwa, ler Zezi ti pe antre dan en lavil, dis zonm ki ti annan lalep ti debout dan lwen e kriye: ‘Zezi, ed nou!’ Sa letan, dimoun ki ti ganny lalep ti napa drwa vin o bor lezot dimoun. Zezi ti demann sa bann zonm pour al kot tanp, parey Lalwa Zeova ti demann bann lepre pour fer apre ki zot in ganny geri. Ler zot ti pe al kot tanp, zot ti ganny geri. Ler enn bann lepre ti  realize ki i ti’n ganny geri, i ti retourn kot Zezi pour dir li mersi e loue Bondye. Parmi sa dis lepre, zis enn ki ti dir Zezi mersi.

En madanm ki ti’n malad pour douz an ti dezespere e i ti anvi ganny geri. I ti vin par deryer Zezi dan en lafoul dimoun e i ti tous son lenz. Deswit i ti ganny geri. Ler sa ti arive, Zezi ti demande: “Lekel ki’n tous mwan?” Sa madanm ti per me i ti al kot Zezi e dir li laverite. Zezi ti reasir li e dir: ‘Mon fiy, al anpe.’

En msye ki apel Zairis ti sipliy Zezi: ‘Vin kot mon lakaz! Mon pti fiy i byen malad.’ Me son pti fiy ti mor avan ler Zezi i ariv kot lakaz Zairis. Ler Zezi ti arive, i ti vwar en kantite dimoun ki ti’n vin senpatiz avek fanmir. Zezi ti dir zot: ‘Aret plere, i pe zis dormi.’ Apre i ti pran lanmen sa fiy e dir: “Pti fiy, leve!” Deswit i ti asize e Zezi ti demann son paran pour donn li en keksoz pour manze. Zis mazinen ki mannyer son paran ti santi!