Yezu nana dugukolo kan walisa ka kibaro diiman fɔ Ala ka Masaya koo la. Walisa k’a yira Yezu bena min kɛ n’a kɛra Masacɛ ye, Jehova ye hakili senu di a ma ka kabakow kɛ. A tun bena se ka bana sifa bɛɛ ban. A tun be taga yɔrɔ o yɔrɔ, banabagatɔw tun be taga dɛmɛ ɲini a fɛ ani a tun b’u bɛɛ kɛnɛya. Fiyentɔw tun be yeli kɛ, bobow tun be mɛnni kɛ, murukuw tun be tagama ani jinaw tun be minw tɔɔrɔ, a tun b’o jinaw gwɛn ka bɔ o mɔgɔw la. Hali n’u tun magara a ka fani dagolo la, u tun be kɛnɛya. Yezu tun be taga yɔrɔ o yɔrɔ, mɔgɔw tun be tugu a kɔ. A ma deli ka mɔgɔ si gwɛn ka bɔ a kɔrɔ abada hali n’a tun b’a fɛ ka to a kelen.

Loon dɔ, mɔgɔw nana ni muruku dɔ ye soo dɔ kɔnɔ Yezu tun be yɔrɔ min na. Boon tun fanin lo jama na fɔɔ u tun tɛ se ka don. U ye woo bɔ boon sanfɛla la ka murukucɛ lajigi Yezu ma. O tuma na, Yezu y’a fɔ cɛɛ ye ko: ‘Wuli ka tagama.’ A wulila ka tagama tuma min na, mɔgɔw kabakoyara.

Loon wɛrɛ la, Yezu dontɔ dugu dɔ kɔnɔ, kunatɔcɛ tan tora yɔrɔjan ka kule ko: ‘Yezu, an dɛmɛ!’ O wagati la, a tun bɛnnin tɛ kunatɔw ka gwɛrɛ mɔgɔw la. Yezu y’a fɔ o cɛɛw ye ko u ka taga Alabatosoba la. Ka kɛɲɛ ni Jehova ka sariya ye, kunatɔw tun ka kan ka k’o lo kɛ u kɛnɛyanin kɔ. K’o cɛɛw to sira kan, u kɛnɛyara. U la mɔgɔ kelen kɔsegira ka taga Yezu fo ani ka Ala tando. O mɔgɔ tan cɛma, o cɛɛ dɔrɔn lo ye Yezu fo.

 Muso dɔ tun bananin lo kabi saan 12. A tun b’a seko bɛɛ kɛra walisa ka kɛnɛya. A donna jama cɛma ka maga Yezu ka fani dagolo la, a kɔfɛ. A kɛnɛyara yɔrɔnin kelen. O kɛra tuma min na, Yezu ye ɲiningali kɛ ko: “Jɔn le magara n ka fani na?” Muso siranna, nka a tagara Yezu ɲɛfɛ ka tiɲɛn fɔ a ye. Yezu y’a dusu saalo k’a fɔ a ye ko: ‘ N’ denmuso, taga hɛɛrɛ la.’

Alabatoso kuntigi dɔ tun tɔgɔ ko Zayirus. A y’a sɔbɛ don ka Yezu deli ko: ‘Na n’ ka soo! N’ denmuso man kɛnɛ ani a ka bana ka jugu.’ Nka sanni Yezu ka se Zayirus ka soo, deen sara. Yezu sera tuma min na, a ye mɔgɔ caaman sɔrɔ ni Zayirus somɔgɔw ye u be kasira. Yezu y’a fɔ u ye ko: ‘Aw kana kasi. Deen nin be sinɔgɔra le.’ O tuma na, a ye deen minɛ a bolo ma k’a fɔ ko: “Sungurunin, wuli!” Yɔrɔnin kelen, deen wulila ka sigi. Yezu y’a fɔ a wolobagaw ye k’u ka dumuni di a ma. Miiri dɔɔni k’a filɛ deen wolobagaw ninsɔn tun be cogo min na!