E roko Iesu i aon te aba bwa e na tataekina te rongorongo ae raoiroi ae taekan Ana Tautaeka n Uea te Atua. Ni kaotan te bwai ae e na karaoia Iesu ngkana e a riki bwa te Uea, e anganna Iehova te taamnei ae raoiroi ibukini karaoani kakai. E kona ni katoki aeka n aoraki nako. N taabo ake e nako iai, a roroko aomata aika aoraki irouna bwa a kani buokaki, ao e kamarurungia ni kabane. A a noraaba mataki, a a ongo bonotaninga, a a kona n nakonako mwauku, ao a kainaomataaki naake a taniaki n te taimonio. E ngae ngke a tii ringa rabin ana kunnikai, ma a a marurung naba. A ririmwin Iesu aomata nakon taabo ake e nako iai. E ngae ngke e a kan tiku Iesu n tii ngaia, ma e aki kona ni kanakoia aomata.

N te taina ao aomata a uota te mwaane ae mate bwain rabwatana nakon te auti are e mena iai Iesu. Ma e a rangi n onrake te auti irouia aomata, ao a aikoa kona n rin. Ngaia are a kabwangabwangaa taubukin te auti ao a karuoa teuarei nakon Iesu. Ao e taku Iesu nakoina: ‘Teirake ao nakonako.’ Ngke e teirake n nakonako teuaei, ao a rangi ni mimi aomata.

N te tai teuana ngke e rin Iesu n te kaawa, ao a tei mai kiraroa rebera aika tengaun ao a tatakarua ni kangai: ‘Iesu, buokira!’ Ni boong akanne, a aki kariaiakaki rebera bwa a na kaania ma aomata. E tuangia Iesu bwa a na nakon te tembora, n aron ae kaotaki n Ana Tua Iehova bwa a riai ni karaoia rebera ngkana a marurung. I aoni kawaia nakon te  tembora, ao a a marurung naba. Ngke e a ataia temanna i buakoia rebera aikai bwa e a marurung, ao e oki rikaaki ni karabwaa Iesu ao ni karaoiroa te Atua. Bon tii teuaei i buakoia ake tengaun, ae e oki ni karabwaa Iesu.

Iai te aine ae aoraki i nanon 12 te ririki, ao e rangi ni kani marurung. E nako akun Iesu i buakoia aomata aika bati, ao e ringa rabin ana kauaatao. E a marurung naba ngkekei. Ngke e riki anne, ao e taku Iesu: “Antai ae ringai?” E maaku neiei, ma e keerake ao e kaota te koaua. E karaua nanona Iesu ao e taku: ‘Natiu, naako ma te rau.’

E roko te mataniwi temanna ae arana Iairo ni bubutiia Iesu ni kangai: ‘Nakomai nakon au auti! E a rangi n aoraki natiu te aine ae uarereke.’ Ma imwain rokon Iesu n ana auti Iairo, ao e a mate te teinnaine anne. Ngke e roko Iesu, e noriia aomata aika bati ake a a roko n tang i rarikia kaain te utu aei. E taku Iesu nakoia: ‘Tai tang, bwa e matu.’ Ao e anaa bain te teinnaine arei ao e taku: “Te teinnaine, teirake!” ao e a rina naba n tekateka, ao Iesu e tuangia ana karo bwa a na anganna kanana. Iangoa aroni kukureia ana karo!