Jesus isch uf d Erde cho, zum di gueti Botschaft vom Königriich vo Gott bekannt z mache. Mit em heilige Geischt, wo er vo Jehova überchunnt, macht er vil Wunder. Eso zeigt Jesus, was er als König emal wird mache. Er cha alli Chrankheite heile. Überall chömmed di Chranke zu ihm und er macht alli wider gsund. Blindi chönnd plötzlich gseh, Ghörlosi chönnd ghöre und Glähmti chönnd laufe. Und alli, wo vo Dämone gstüüred werded, sind vo ihne befreit. Sogar denn, wenn d Mensche nume d Fransle vom Chleid vo Jesus alanged, werded si gheilt. Si laufed ihm überall hindenache. Und er schickt niemer furt, nid emal, wenn er eigentlich möcht allei sii.

Einisch bringed es paar Männer en Maa, wo glähmt isch, zu dem Huus, wo Jesus grad isch. Aber si chönnd nid ine, wils eso vil Lüt het. Da mached si es Loch is Dach und lönd de Glähmti ufeme Tragbett zu Jesus abe. Jesus seit zu ihm: «Stah uf und lauf umenand.» Da staht de Maa uf und cha laufe, und d Lüt stuuned nume eso.

Wo Jesus in es Dorf gaht, rüefed 10 Männer, wo Ussatz hend, vo Wiitem: «Jesus, hilf üs!» Zu dere Ziit dörfed Mensche, wo Ussatz hend, andere Lüt nid z nöch cho. Jesus seit zu dene Männer, si sölled zum Tempel gah. Im Gsetz vo Jehova staht nämlich, dass Mensche, wo Ussatz hend, das mache müend, sobald si wider gsund sind. Unterwegs werded die Männer gheilt. Wo eine vo ihne merkt, dass er gsund isch, gaht er zu Jesus zrugg. Er seit ihm Danke und tuet Gott verehre. Er isch de Einzig vo dene 10, wo sich bi Jesus bedankt.

E Frau, wo scho 12 Jahr lang chrank isch, möcht unbedingt gsund werde. Wo ganz vil Mensche um Jesus ume sind, gaht si zwüsche de Lüt dure und langet vo hinde d Fransle vom Chleid vo Jesus a. Sofort isch si gsund. Da fragt Jesus: «Wer het mich aglanget?» D Frau het Angscht, aber si chunnt gliich vüre und verzellt ihm alles. Jesus tröschtet si und seit zu ihre: «Liebi Frau, du chasch im Fride gah.»

En wichtige Maa vo de Synagoge, de Jairus, seit zu Jesus: «Mini chlii Tochter isch ganz fescht chrank. Chumm bitte mit.» Aber no bevor Jesus bim Huus vom Jairus achunnt, stirbt s Meitli. Wo Jesus denn dört isch und di vile Lüt gseht, wo mit de Familie tüend truure, seit er zu ihne: «Ihr müend nid truurig sii, si isch nume am Schlafe.» Denn nimmt er d Hand vom Meitli und seit: «Chind, stah uf!» Sofort sitzt si uf und Jesus seit zu ihrne Eltere, dass si ihre öppis z esse bringe sölled. Stell dir vor, wie sich ihri Eltere freued!