Antüshi Jesuu yaa mmapaʼamüin süpüla nüküjain pütchi süchiki Nuluwataaya Maleiwa. Naapüin Jeʼwaa nümüin Jesuu chi naaʼinkai süpüla naaʼinrüin kasa pülasü jee süpüla sütüjaanüin aaʼu tü naaʼinrajatkat mapeena nüikalaapa sünain aluwatawaa. Jamüshijaʼa Jesuu, nuuntuin niiyajüin wayuu eekai ayuulin. Eepünaale nülatüin, watta saalii wayuu ayuuisü achuntaka kaaliinwaa nümüin. Anashii napüshuaʼa nutuma. Jamüshiijaʼa na moʼusaliikana, koʼushii nutuma, na macheʼesaliikana, kacheʼeshii nutuma otta na outakana asaʼa, kasaʼashii nutuma. Jaʼitaina nepettüin sot nüsheʼin Jesuu, anashii naya nutuma. Jee nujuʼitirüin yolujaa süleʼeruʼujee wayuu. Watta saalii wayuu anoujakana nünain Jesuu, kamaneeshi nia namüin otta nnojoishi nia jashichin namüin, jaʼitaichi mapüsain maʼin nia.

Soʼu wanee kaʼi, antinnüshi nünainmüin Jesuu wanee wayuu outa asaʼachi. Süka wainmain wayuu soʼuluʼu tü miichikat, isasü nachiki ekeroloo nünainmüin Jesuu na wayuu alüʼüjiraaka chia wayuukai. Naliikajaaka nümaa chi wayuukai chaa süraloʼumüin tü miichikat, naakataka shiʼipa saajuna. Nashakatitka tü süi kaluʼukot chi wayuu outa asaʼachikai. «Tawalachee, püshaʼwalaa jee puwaraʼiraa maa», nümaka Jesuu nümüin. Wanaa sümaa nuwaraʼiraain chi wayuukai, ponusü maʼin saaʼin tü wayuukalüirua.

Soʼu wanee kaʼi, nülüʼütpa Jesuu süpüla nüntüin suluʼumüin wanee pueulo, eejana nüpüla polooshii wayuu ajaʼttaa atachii. Shaʼwashawatshii kaʼyata nuulia. «Jesuu, piiyaja maa waya», namaka sümaa emetuluin nanüiki. Soʼu tia, nnojoishi arütkaainjachin wanee wayuu ajaʼtta atachi sünainmüin wayuu. Saashin tü pütchi naapakat Jeʼwaa nümüin Moisés, oʼunuinjachi wanee ajaʼtta atachi eemüin chi Sacerdootekai süshatapa nüta. Nüküjaka Jesuu namüin na polooshii wayuu noʼunuinjanain eemüin chi sacerdootekai, wopuluʼupa  naya, ashatüsü tü natakat. Niasaʼa wanee naʼakajee aleʼejaashi nia nüchikuaʼa eemüin Jesuu süpüla naapüin analuʼut nümüin jee süpüla nuʼwaajüinjachin chi Maleiwakai. Waneeshia neʼe chi aapakai analuʼut nümüin Jesuu naʼakajee na polooshiikana.

Eejatü wanee wayuu ayuuisü maʼin. 12 juya amülain isha sümüin. Aneesü maʼin shia süchikuaʼa. Amülüʼiraasü shia saʼakajee tü wayuukalüirua nünainmüin Jesuu süpüla shipettüin nüsheʼin. Shipettapa shia, oʼunusü tü ayuuliikat suulia. «¿Jara epettaka tasheʼin?», nümaka Jesuu. Sürütkaaka nünainmüin Jesuu sümaa mmoluin shia. Süküjaka nümüin sünain shiain epettüin tü nüsheʼinkat jee sünain anaitpain shia nutuma. «Nii waaʼiraa, anaitpa pia. Anasü puʼunüle sünain anain paaʼin», nümaka Jesuu sümüin süpüla nümülialüin saaʼin.

Eeshi wanee wayuu Jairo münüshi, laülaashi nia suluʼu tü ekirajüleekat tü judíokalüirua. «Jooʼuya tamaiwa pia piichipaʼamüin. Ayuuisü maʼin wanee tachon», müshi nümüin Jesuu. Nnojoliiwaʼaya nüntüin Jesuu nipialuʼumüin Jairo, anaajaasü tü jintutkat. Nüntapa Jesuu nipialuʼumüin Jairo, wainma wayuu aʼyalajüsü nüpüla süchiirua tü jintutkat. Nümaka Jesuu: «Nnojo jiʼyalajüin. Tü jintutkat, atunküsü neʼe». Naapaaka Jesuu sajapü tü jintutkat sümaa nümüin sümüin: «¡Tachee, püchijiraa maala!». Ashaʼwalaa müsia tü jintutkat, katüsü soʼu süchikuaʼa. Nümaka Jesuu nümüin chi süshikai jee tü shiikat süpüla nekirüinjatüin shia. ¡Talatakajasaʼa naaʼin na wayuu kachonkana shia!, ¿aashimüin?