NUPINPLỌN 79
Jesu Wà Azọ́njiawu Susu
Jesu wá aigba ji nado lá wẹndagbe Ahọluduta Jiwheyẹwhe tọn. Nado do nuhe Jesu na wà to whenue e na lẹzun Ahọlu hia, Jehovah na ẹn gbigbọ wiwe na e nido wà azọ́njiawu lẹ. E gán hẹn azọ̀n depope gbọ. To fidepope he e yì, mẹhe to azọ̀njẹ lẹ nọ wá biọ alọgọ etọn, bọ e nọ hẹnazọ̀ngbọna yemẹpo. E nọ hẹn nukuntọ́nnọ lẹ mọnú bọ tókunọ lẹ nọ sènu, awukuzọ̀njẹtọ lẹ nọ zinzọnlin, podọ mẹhe to anademẹ aovi lẹ tọn glọ lẹ nọ yin tuntundote. Eyin yé tlẹ doalọ tónu avọ̀ etọn tọn go poun, yé nọ jẹgangan. Mẹlẹ nọ to hihodo Jesu yì fidepope he e yì. Eyin Jesu tlẹ jlo na nọ edeṣo, e ma nọ yàn mẹlẹ dogbé gbede.
To gbèdopo, gbẹtọ lẹ hẹn dawe awukuzọ̀njẹtọ de wá fie Jesu te. Amọ́, gbẹtọ lẹ gọ́ ohọ̀ lọ mẹ sọmọ bọ yé ma gán biọ e mẹ. Enẹwutu, yé deali gbọn họta nado ze dawe lọ jẹte wá Jesu dè. Jesu sọ dọna dawe lọ dọmọ: ‘Fọnṣite bo zinzọnlin.’ Dawe lọ wàmọ bọ awuji gbẹtọ lẹ.
To ojlẹ devo mẹ, dile Jesu biọ gbétatò de mẹ, sunnu ao delẹ he to pòzọ̀n jẹ nọte to olá bo to awhádo dọmọ: ‘Jesu, gọalọna mí!’ To ojlẹ enẹlẹ mẹ, dotẹnmẹ ma nọ yin nina mẹhe to pòzọ̀n jẹ lẹ nado sẹpọ mẹdevo lẹ. Jesu dọna dawe lọ lẹ dọ yé ni yì tẹmpli mẹ, dile Osẹ́n Jehovah tọn biọ dọ mẹhe ko jẹgangan sọn pòzọ̀n mẹ lẹ ni nọ wà do. To whenue yé to aliji jei, azọ̀n yetọn gbọ. Whenue dopo to yé mẹ doayi e go dọ emi ko jẹgangan, e lẹkọwa Jesu dè nado dopẹna ẹn bo pà Jiwheyẹwhe. To yé omẹ ao lọ lẹ mẹ, omẹ enẹ kẹdẹ wẹ wá dopẹna Jesu.
Yọnnu he ko to awutujẹ na owhe 12 de to azọ̀nhẹngbọ dín vẹkuvẹku. E biọ gbẹtọgun he to godona Jesu lẹ mẹ bo doalọ tónu awugbó etọn tọn go. E sọ jẹgangan to afọdopolọji. To whenue ehe jọ, Jesu kanse dọmọ: “Mẹnu wẹ doalọ go e?” Obu jẹ nawe lọ ji, ṣogan e sẹwá nukọn bo dọ nuhe e wà lọ na ẹn. Jesu miọnhomẹna ẹn dọmọ: ‘Viyọnnu ṣie, yì to jijọho mẹ.’
Ahọluzọnwatọ de he nọ yin Jailu vẹ̀ Jesu dọmọ: ‘Wá owhé ṣie gbè! Viyọnnu ṣie pẹvi to azọ̀njẹ sinsinyẹn.’ Amọ́, whẹpo Jesu nado jẹ owhé Jailu tọn gbè, viyọnnu lọ ko kú. Whenue Jesu jẹ finẹ, e mọdọ mẹsusu ko wá nado nọ aluẹmẹ hẹ whẹndo lọ. Jesu dọna yé dọmọ: ‘Mì ma viavi blo; amlọndọ wẹ e te poun.’ Enẹgodo, e hẹn alọ viyọnnu lọ tọn go bo dọmọ: “Viyọnnu pẹvi, fọ́n!” Ovi lọ sọ fọ́n sinai to afọdopolọji bọ Jesu dọna mẹjitọ etọn lẹ dọ yé ni na ẹn núdùdù. Pọ́n lehe e na ko vivi na mẹjitọ etọn lẹ do!
“Jiwheyẹwhe yí gbigbọ wiwe po huhlọn po do yiamisisadode Jesu . . . bọ ewọ jugbọn aigba lọ ji bo to dagbe wà bosọ to azọ̀nhẹngbọna mẹhe Lẹgba ko gbidikọna lẹpo, na Jiwheyẹwhe tin hẹ ẹ wutu.”—Owalọ lẹ 10:38
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
“Ylando Towe lẹ Ko Yin Jijona We”
Kanṣiṣa tẹwẹ Jesu dohia dọ e tin to ylando po azọ̀n po ṣẹnṣẹn?
JESU—ALIHO LỌ, NUGBO LỌ PO OGBẸ̀ PO
E Doalọ Awù Jesu Tọn Go bo Yin Azọ̀nhẹngbọna
Jesu do huhlọn po awuvẹmẹ etọn po hia to nujijọ he miọnhomẹnamẹ ehe whenu.
JESU—ALIHO LỌ, NUGBO LỌ PO OGBẸ̀ PO
Viyọnnu Pẹvi de Gọwá Ogbẹ̀!
Gbẹtọ lẹ jẹ Jesu ṣanko ji to whenue e dọ dọ viyọnnu he ko kú lọ to amlọndọ poun wẹ. Etẹwẹ ewọ yọnẹn bọ yewlẹ ma yọnẹn?
JESU—ALIHO LỌ, NUGBO LỌ PO OGBẸ̀ PO
Pòtọnọ Dopo Wẹ Do Pinpẹn-Nutọn-Yinyọnẹn Hia
Dawe he yin azọ̀nhẹngbọna lọ do pinpẹn-nutọn-yinyọnẹn hia Jesu, amọ́ e sọ dohia mẹdevo ga.
JESU—ALIHO LỌ, NUGBO LỌ PO OGBẸ̀ PO
Mẹnu Wẹ Na Huhlọn Jesu Nado Wà Azọ́njiawu Lẹ?
Nọvisunnu Jesu tọn lẹ lẹndọ e ko hùn tadu.
