Si Jesus nagkadto diri sa duta para ipahayag ang maayong balita sang Ginharian sang Dios. Para mapakita kon ano ang himuon ni Jesus bilang Hari, ginhatagan sia ni Jehova sing balaan nga espiritu para maghimo sing mga milagro. Maayo niya ang tanan nga klase sang balatian. Bisan diin sia magkadto, ang mga masakiton nagapangayo sing bulig sa iya, kag gin-ayo niya sila tanan. Makakita na ang mga bulag, makabati ang mga bungol, makalakat ang mga paralisado, kag ginhilway niya ang mga ginpaantos sang demonyo. Bisan punta lang gani sang iya bayo ang ila matandog, nagaayo sila. Ginasunod sang mga tawo si Jesus bisan diin sia magkadto. Bisan gusto ni Jesus mag-isahanon, wala niya sila ginapahalin.

Isa ka bes, gindala sang mga tawo ang paralisado nga tawo sa balay nga ginadayunan ni Jesus. Pero gutok katama ang balay amo nga indi sila makasulod. Gani ginhukas nila ang atop nga malapit kay Jesus kag gintunton ang tawo. Dayon ginsilingan ni Jesus ang tawo: ‘Bangon ka kag maglakat.’ Sang ginhimo niya ini, natingala gid ang mga tawo.

Sang isa pa ka bes, sang nagapasulod si Jesus sa baryo, may napulo ka aruon nga nagatindog sa malayo nga nagasinggit: ‘Jesus, buligi kami!’ Sang una, ang mga aruon indi puede magpalapit sa mga tawo. Ginsilingan ni Jesus ang mga aruon nga magkadto sa templo, kay suno sa Kasuguan ni Jehova amo ini ang dapat himuon sang mga nag-ayo sa aro. Samtang nagapakadto sila didto, nag-ayo sila. Sang nakita sang isa ka aruon nga nag-ayo na sia, nagbalik  sia para pasalamatan si Jesus kag gindayaw niya ang Dios. Sa napulo ka aruon nga nag-ayo, isa lang ang nagpasalamat kay Jesus.

Ang isa ka babayi nga 12 ka tuig na nga nagamasakit, gusto na gid mag-ayo. Nagpanagil-ot sia sa madamo nga tawo pakadto sa likod ni Jesus kag gintandog niya ang punta sang iya bayo. Sa gilayon, nag-ayo sia. Sang natabo ini, si Jesus namangkot: “Sin-o ang nagtandog sa akon?” Hinadlukan ang babayi, pero nagkadto sia sa atubangan kag ginsugid ang matuod. Ginpaumpawan sia ni Jesus nga nagasiling: ‘Anak, lakat ka nga may paghidait.’

Ang opisyal nga si Jairo nakitluoy kay Jesus: ‘Kadto ka sa akon balay! Grabe ang masakit sang akon bata nga babayi.’ Pero wala pa kaabot si Jesus sa balay ni Jairo, napatay ang bata. Pag-abot ni Jesus, nakita niya nga madamo sing tawo ang nagkadto didto para magkasubo upod sa pamilya. Si Jesus nagsiling sa ila: ‘Indi kamo maghibi; nagakatulog lang sia.’ Dayon gin-uyatan niya ang kamot sang bata kag nagsiling: ‘Inday, bangon ka!’ Nagpungko dayon ang bata, kag ginhambalan ni Jesus ang iya mga ginikanan nga hatagan sia sing pagkaon. Imadyina kon ano ang ginbatyag sang iya mga ginikanan!