Yexus los hauv ntiajteb los tshaj tawm txog Vajtswv lub Nceeg Vaj. Yehauvas tau muab lub hwj huam dawb huv rau Yexus ua ntau yam txujci kom tibneeg pom tias thaum Yexus ua Vajntxwv kav yuav zoo li cas. Txhua qhov chaw uas Yexus mus, muaj neeg coj cov neeg mob tuaj rau nws kho. Nws kho tau lawv txhua tus zoo huvsi. Cov dig muag thiab cov lag ntseg rov hnov lus thiab pom kev. Cov tuag tes tuag taw thiab cov neeg raug dab los nws ntiab tau dab tawm tibsi. Txawm tibneeg kov nws lub tw tsho xwb los lawv tus mob cia li zoo huvsi thiab. Tibneeg thiaj caum Yexus qab mus rau txhua txhia qhov chaw. Txawm muaj tej lub sijhawm Yexus xav so ib leeg los, nws tseem tos txais sawvdaws.

Muaj ib zaug, tibneeg coj ib tug tuag tes tuag taw tuaj cuag Yexus tiamsis muaj neeg coob heev, lawv nkag tsis tau mus rau hauv tsev. Lawv txawm tho ib lub qhov saum ru tsev ces muab tus neeg tuag tes taw tso dauv los ncaj ntawm Yexus. Ces Yexus hais rau tus neeg ntawd tias: ‘Cia li sawv tsees mus kev.’ Tus neeg ntawd txawm mus taus kev mas ua rau sawvdaws xav tsis thoob li.

Muaj dua ib zaug, thaum Yexus mus txog hauv ib lub zos, muaj 10 tus neeg mob ruas sawv deb deb hu nrov nrov tias: ‘Yexus, thov khuvleej peb!’ Lub caij ntawd, yuav tsum muab cov neeg mob ruas cais ntawm cov uas tsis mob. Yehauvas Txoj Kevcai hais tias yog ib tug neeg mob ruas zoo lawm, nws yuav tsum mus cuag cov pov thawj rau hauv lub tuam tsev. Yexus thiaj hais kom cov mob ruas mus rau ntawm lub tuam tsev. Thaum lawv  tabtom mus, lawv cia li zoo tas tus. Ib tug rov los ua Yexus tsaug thiab qhuas Vajtswv thaum nws pom tias nws zoo lawm. Muaj 10 leej diam tiamsis tsuas muaj ib leeg los ua Yexus tsaug xwb.

Muaj ib tug pojniam uas mob tau 12 xyoos nkaus. Nws yeej xav kom nws tus mob zoo. Nws thiaj mus kov kiag Yexus lub tw tsho rau thaum muaj neeg coob coob sib txiv raws Yexus qab mus. Tamsim ntawd, nws tus mob txawm zoo hlo lawm. Thaum ntawd, Yexus thiaj hais tias: ‘Leejtwg kov kuv?’ Tus pojniam ntshai heev tiamsis nws lees kiag thiab qhia tseeb rau Yexus. Ces Yexus nplig nws tias: ‘Mentxhais, cia li zoo siab hlo mus.’

Yaila, uas yog ib tug thawj, tuaj thov Yexus tias: ‘Thov mus tom kuv tsev! Kuv tus mentxhais mob hnyav heev.’ Tiamsis thaum Yexus tseem mus tsis tau txog, Yaila tus ntxhais twb tuag lawm. Thaum Yexus mus txog, nws pom neeg coob coob tuaj nrog Yaila tsev neeg quaj. Yexus thiaj hais rau lawv tias: ‘Tsis txhob quaj, nws tsaug zog xwb.’ Yexus txawm tuav tus mentxhais txhais tes thiab hais tias: ‘Mentxhais, cia li sawv tsees! Tus ntxhais thiaj li sawv tsees tamsim ntawd. Yexus hais kom lawv muab mov rau nws noj. Ntshe nws niam nws txiv zoo siab tshaj plaws li!