Immay ni Jesus ditoy daga tapno ikasabana ti naimbag a damag maipapan iti Pagarian ti Dios. Tapno maipakita ni Jesus ti aramidennanto kas Ari, inikkan ni Jehova iti nasantuan nga espiritu tapno makaaramid kadagiti milagro. Mapaimbagna ti amin a sakit. Iti sadinoman a napananna, nagpatulong kenkuana dagiti masakit ket pinaimbagna ida. Nakakita dagiti bulsek, nakangngeg dagiti tuleng, nakapagna dagiti paralisado, ken natulongan dagiti naluganan iti demonio. Uray masagidda laeng ti gayadan ti bado ni Jesus, umimbagdan. Sinursurot isuna dagiti tattao. Uray no kayatna idi ti agmaymaysa, saanna a pinapanaw dagiti tattao.

Naminsan, nangipan dagiti tattao iti paralisado a lalaki iti balay a paggigianan ni Jesus. Ngem dida makastrek ta nagadu ti tao. Isu nga inabutanda ti atep sa imbabada ti lalaki iti ayan ni Jesus. Kinuna ni Jesus iti lalaki: ‘Bumangonka ket magnaka.’ Nagna ti lalaki ket nagbilib dagiti tattao.

Naminsan pay, bayat a sumsumrek ni Jesus iti maysa a purok, adda 10 nga agkukutel a nakatakder iti medio adayo ket impukkawda: ‘Jesus, tulongannakami!’ Saan idi a mabalin nga umasideg dagiti agkukutel kadagiti tattao. Imbaga ni Jesus a mapanda iti templo, kas iti ibagbaga ti Linteg ni Jehova nga aramiden dagiti agkukutel no immimbagdan. Bayat a mapmapanda iti templo, immimbagda. Maysa kadakuada ti  nagsubli ken Jesus ket nagyaman ken indaydayawna ti Dios. Iti 10 nga agkukutel, isu laeng ti nagyaman ken Jesus.

Adda babai a 12 a tawenen nga agsaksakit ket kayatna unay ti umimbag. Nakilinnetlet iti adu a tao ket napan iti likud ni Jesus sa sinagidna ti gayadan ti badona. Dagus nga immimbag. Nadlaw dayta ni Jesus ket insaludsodna: “Asino ti nangsagid kaniak?” Nagbuteng ti babai, ngem immasideg ken Jesus ket imbagana ti agpayso. Liniwliwa ni Jesus ket imbagana: ‘Anakko, agawidkan a sitatalna.’

Maysa nga opisial nga agnagan Jairo ti nangipakaasi ken Jesus: ‘Umayka idiay balay! Nakaro ti sakit ti balasitangko.’ Ngem sakbay a makadanon ni Jesus iti balayda, natay ti balasitang. Idi nakasangpet ni Jesus, nakitana nga adu a tao ti makipagladladingit iti pamilia. Imbaga ni Jesus: ‘Isardengyo ti agsangit ta matmaturog laeng ti ubing.’ Idi kuan, iniggamanna ti ima ti ubing sa imbagana: “Balasitang, bumangonka!” Dagus a bimmangon, ket imbaga ni Jesus kadagiti nagannakna nga ikkanda iti makan. Mapanunotmo kadi ti narikna dagiti nagannakna?