Yesu gaw, Karai Kasang a Mungdan hte seng ai kabu gara shiga hkaw tsun na matu, mungkan ga de du sa wa ai re. Yesu gaw hkawhkam byin na wa re ai hpe masha ni chye lu hkra, mauhpa lam ni madun dan lu na matu, Yehowa gaw Yesu hpe chyoi pra ai wenyi jaw ai. Shi gaw, ana ahkya yawng hpe shamai ya lu ai. Shi gara kaw mi du du, machyi ai masha ni gaw shi hpang de sa wa nna, shi gaw shanhte yawng hpe shamai ya ai. Myi n mu ai ni mu lu wa ai, na n na ai ni na wa ai, hkum katsing si ai ni lam hkawm lu wa ai. Nat shang ai ni hpe mung, nat shaden kau ya ai. Shi a palawng matu sha jum ai ni pyi, shamai hkrum ma ai. Yesu gara de sa sa, masha ni hkan nang ma ai. Shi hkrai sha nga mayu ai aten ni hta pyi, masha ni hpe Yesu n kabai da ai.

Kalang mi hta, masha ni gaw hkum katsing si ai masha langai hpe Yesu nga ai nta de shaga sa wa ai. Raitim, nta ting masha hpring taw nga ai majaw, n lu shang ai. Dai majaw, nta numgaw hta hku langai mi galaw nna, dai masha wa hpe Yesu nga ai shara de du hkra angwi ngwi jahkrat ya ai. Dai shaloi, Yesu gaw dai hkum katsing si ai wa hpe ndai hku tsun ai: ‘Rawt nna lam hkawm u.’ Dai wa lam lu hkawm wa ai shaloi, masha ni mau mat ai.

Kalang mi hta gaw, mare langai de Yesu shang wa ai shaloi, manggang kap ai marai 10 gaw tsan tsan kaw nna tsap let ndai hku marawn taw ma ai: ‘Yesu e, anhte hpe karum ya rit.’ Dai aten ni hta, manggang kap ai ni gaw kaga masha ni hte ni ni htep htep n mai nga ai. Yesu gaw dai masha ni hpe nawku htingnu de sa na matu tsun ai. Manggang ana mai mat yang, nawku htingnu de sa na matu Yehowa a Tara hta hkang da ai. Dai de sa nga ai laman, shanhte a manggang ana mai mat ai. Manggang kap ai ni kaw nna, marai langai gaw, shi mai mat ai hpe chye dat ai  shaloi, Yesu hpang de bai sa wa nna chyeju dum ga sa tsun let Karai Kasang hpe mung shakawn ai. Marai 10 kaw nna, langai sha Yesu hpe chyeju dum ai re.

Anum langai gaw 12 ning tup machyi sawng nga ai majaw, grai mai mayu taw nga ai. Dai anum gaw shawa hpawng hta, Yesu hpang de sa nna, shi a palawng matu hpe jum dat ai. Dai shaloi, kalang ta mai mat ai. Shaloi Yesu gaw: “Ngai hpe ahtawk ai kadai rai ta?” nga nna tsun ai. Dai anum gaw grai hkrit kajawng mat tim, Yesu hpang de sit sa wa nna byin mat ai lam yawng hpe tsun dan ai. Yesu gaw ndai hku tsun nna shi hpe shalan shabran ya ai: ‘Ngai sha e, ngwi pyaw ai hte wa su.’

Ya-iru ngu ai tara jawng agyi langai gaw, Yesu hpe: ‘Nye nta de sa wa ya rit. Nye a shayi sha grai machyi sawng nga ai’ ngu nna tsun ai. Raitim, Yesu shi nta de n du shi ai laman, shayi sha si mat ai. Dai nta de Yesu du ai shaloi, masha law law gaw nta masha ni hte arau yawn hkyen nga ma ai hpe mu ai. Yesu ndai hku tsun ai: ‘Hkum hkrap nga mu. Shi yup pyaw nga ai she re.’ Dai hpang, numsha a lata hpe jum nna ndai hku tsun dat ai: “Ma e, rawt u.” Shaloi, dai ma gaw kalang ta rawt dung ai. Dai hpang, Yesu gaw dai ma hpe shahpa lama ma jaw na matu kanu yan kawa hpe tsun ai. Kanu yan kawa gara hku hkamsha mat na hpe shingran yu u!