Jizus ben Téra pa pâpia di notísias sábi di Reinu di Deus. Jeová da Jizus se spritu santu pa faze milagris, pa mostra kuzê ki el ta ben fazeba óras ki el biraba Rei. El ta kuraba tudu tipu di duénsas. Ka ta nporta undi ki el staba, duentis ta bai atxaba el pa el djuda-s i el ta kuraba tudu es. Algen ségu pasa ta odja, surdus pasa ta obi, algen paralizadu pasa ta anda i el liberta pesoas ki tinha dimónis. Sô di poi mô na se ropa es ta fikaba kuradu. Pa undi ki Jizus baba, gentis ta sigiba el. Óras ki gentis ben atxaba el, el ka ta mandaba ningen pa bai se kaminhu, sikrê éra na óra ki el kria fikaba el sô.

Un dia, gentis leba un ómi paralizadu pa un kaza ki Jizus staba. Má kaza staba xeiu di algen i es ka konsigi entra. Pur isu es faze un braku na tedja i es dixi kel ómi ti Jizus. Nton Jizus fla-l: ‘Labanta bu anda.’ Kantu el kumesa ta anda pesoas fika uma spantadu.

Un otu bês, Jizus entra na un vila. Staba la 10 ómi ku duénsa di lépra sakédu di lonji i es grita: ‘Jizus, djuda-nu!’ Na kel ténpu, algen ki tinha lépra ta fikaba lonji di otus algen. Jizus fla-s pa es bai pa ténplu, sima Lei di Jeová ta mandaba leprozus pa faze dipôs di ser kuradu. Na kaminhu ta bai, es fika kuradu. Kantu ki un di es da kónta ma el  staba kuradu, el volta pa agradise Jizus i el lova Deus. Di kes 10 leprozu sô kel un ki bai agradise Jizus.

Un mudjer ki dja tinha 12 anu duenti staba ku gana di ser kuradu. Na meiu di monti algen, el bai pa tras di Jizus i el poi mô na se ropa. Kel óra, el bira prontu. Kantu kel-la kontise, Jizus pergunta: ‘Kenha ki pô-m mô?’ Mudjer staba ku uma medu, má el bai pa Jizus i el konta-l verdadi. Jizus anima-l kantu ki el fla-l: ‘Nha fidju-fémia, bai na pas.’

Un ómi ki txomaba Jairu, ki éra governanti di sinagóga pidi Jizus dizimóla: ‘Bai ku mi nha kaza! Nha fidju-fémia sta txeu duenti.’ Má antis di Jizus konsigi txiga na kaza di Jairu, minininha móre. Kantu Jizus txiga la, el odja ma monti algen bai txora ku famílias. Jizus fla-s: ‘Ka nhos txora, el sta sô ta durmi.’ Dipôs el pega minininha na mô i el fla: ‘Minina, labanta!’ El labanta kel óra i Jizus fla se pai ku se mai pa da-l algun kuza pa el kume. Imajina modi ki se pai ku se mai xinti!