Li Jesus kichalk saʼ Ruuchichʼochʼ re xpuktesinkil li chaabʼil esilal chirix li Xʼawabʼejilal li Yos. Joʼkan ajwiʼ, li Jehobʼa kixkʼe re li Jesus li xsantil musiqʼej re xbʼaanunkil ebʼ li sachbʼachʼoolej ut xkʼutbʼesinkil li tixbʼaanu naq twanq choʼq Awabʼej. Yalaq kʼaru li yajel kiruuk xkʼirtasinkil. Ut bʼar nawulak chaq, ebʼ li yaj nekeʼxpatzʼ xtenqʼankil re, ut aʼan naxbʼan chixjunilebʼ. Ebʼ li mutzʼ nekeʼilok, ebʼ li tzʼap xik nekeʼabʼink ut ebʼ li sik nekeʼbʼeek. Yal rikʼin xchʼeʼbʼal chire li raqʼ li Jesus nekeʼkʼiraak. Li Jesus kiʼisink ajwiʼ maaʼus aj musiqʼej. Ebʼ li poyanam nekeʼtaqenk re yalaq bʼar, ut maajunwa kixtzʼeqtaana junaq rehebʼ, chi moko naq kiraj wank xjunes.

Saʼ jun kutan, keʼxkʼam chaq jun li sik saʼ li ochoch bʼarwiʼ wank li Jesus. Abʼan, kʼajoʼebʼ li poyanam ut inkʼaʼ xeʼruuk chi ok, joʼkan naq keʼxjop xbʼeen li ochoch ut aran keʼxkubʼsi li winq toj chixkʼatq li Jesus. Tojaʼ naq li Jesus kixye re li sik: «Waklin ut bʼen». Naq kiʼok chi bʼeek, sachsokebʼ xchʼool xeʼkanaak ebʼ li poyanam.

Saʼ jun chik kutan, li Jesus yook chi wulak saʼ jun li tenamit, ut 10 chi winq saqlepebʼ rix keʼxjap re chi najt: «Jesus, chooʼaatenqʼa!». Chiruhebʼ li kutan aʼan, moko kanabʼanbʼil ta naq ebʼ li saqlep rix teʼjiloq chixkʼatqebʼ li poyanam. Ut li Xchaqʼrabʼ li Jehobʼa naxye chaq naq ebʼ li saqlep rix tento teʼxik saʼ rochoch li Yos naq ak xeʼkʼiraak. Joʼkan naq, li Jesus kixye rehebʼ naq xikaqebʼ aran. Naq yookebʼ chi xik saʼ rochoch li Yos, xeʼkʼiraak. Naq jun rehebʼ kixkʼe  reetal naq kʼirajenaq chik, kisutqʼiik chi xbʼanyoxinkil re li Jesus ut kixkʼe xloqʼal li Yos. Saʼ xyanqebʼ li 10 chi saqlep, jun ajwiʼ kibʼanyoxink chiru li Jesus.

Kiwank jun li ixq li 12 chihabʼ rokik xyajel ut naxrahi ru kʼiraak xbʼaan naq inkʼaʼ chik naxkuy. Joʼkan naq kixchʼik ribʼ saʼ xyanq li tenamit re naq tnachʼoq chirix li Jesus ut kixchʼeʼ chire li raqʼ. Saʼ li hoonal ajwiʼ aʼan, kikʼiraak. Tojaʼ naq li Jesus kixpatzʼ: «Ani xchʼeʼok we?». Li ixq kʼajoʼ txuwaq, abʼan kijilok chixkʼatq ut kixseeraqʼi re chixjunil. Li Jesus kixkʼojobʼ xchʼool ut kixye re: «At wabʼin, ayu saʼ tuqtuukilal».

Jun li awabʼej, Jairo xkʼabʼaʼ, kixtzʼaama re li Jesus: «Chalqat saʼ wochoch. Jwal yaj li wabʼin». Toj maajiʼ ajwiʼ nawulak li Jesus saʼ rochoch laj Jairo naq xkamk li chʼina ixqaʼal. Naq kiwulak, li Jesus kixkʼe reetal naq naabʼalebʼ li poyanam yookebʼ chi yaabʼak rikʼin li xjunkabʼal laj Jairo. Li Jesus kixye rehebʼ: «Mexyaabʼak, yal yook chi wark». Tojaʼ naq kixchap li ruqʼ li chʼina ixqaʼal ut kixye: «At chʼina ixqaʼal, waklin!». Li chʼina ixqaʼal saʼ junpaat kiwakliik, ut li Jesus kixye rehebʼ li xnaʼ xyuwaʼ naq teʼxkʼe bʼayaq xwa. Yal kʼoxla chanru keʼrekʼa ribʼebʼ li xnaʼ xyuwaʼ!