Jesus okwa li e uya kombada yedu opo a udife onghundana iwa yOuhamba waKalunga. Opo Jehova a ulike osho Jesus ta ka ninga eshi ta ka kala Ohamba, okwe mu pa omhepo iyapuki opo a longe oikumwifilonga. Okwa li ha dulu okuvelula oudu keshe. Keshe opo a li a ya, ovanaudu ova li ve uya kuye ndele te va velula aveshe. Ovapofi ova li ve wete ko, ovafitamatwi ova li ve udite ko, oilema oya li tai ende, naavo va li ve na eendemoni ova li va manguluka. Nokuli nongeenge va li va kuma komingenge doshikutu shaye, ova li hava veluka. Ovanhu ova li hava landula Jesus keshe opo a li a ya. Nopefimbo opo a li a hala okukala oye aeke, Jesus kali a shunifa ko nande oumwe.

Pomhito imwe, ovanhu ova li va eta omulumenhu a fya ombada keumbo oko kwa li Jesus. Ashike meumbo omwa li mu yadi unene ovanhu nokava li tava dulu okuya mo. Onghee hano, ova li va ninga ombululu kombada yeumbo ndele tava kulukifile omulumenhu kuJesus. Opo nee Jesus okwa lombwela omulumenhu oo ta ti: ‘Penduka ndele to ende.’ Eshi a tameka okweenda, ovanhu ova li va kumwa.

Efiku limwe vali, eshi Jesus a li ta i momukunda umwe, ovalumenhu omulongo ovo va li ve na oshilundu ova li ofika kokule ndele tava ingida tava ti: ‘Jesus, tu kwafela!’ Pefimbo opo, ovanashilundu kava li va pitikwa okuuya popepi novanhu ovo vehe na oshilundu. Jesus okwa li a lombwela ovalumenhu ovo va ye kotembeli, ngaashi Omhango yaJehova ya ti kutya ovanashilundu osho ve na okuninga ngeenge va veluka. Fimbo va li va yuka kotembeli, ova veluka. Eshi omunashilundu umwe a didilika kutya okwa  veluka, okwa shuna kuJesus e ke mu pandule ndele ta tange Kalunga. Omulumenhu womovalumenhu ovo omulongo oye aeke a li a pandula Jesus.

Omukainhu umwe oo a kala ta ehama oule womido 12 okwa li a halelela okuvelulwa. Okwa li a ya konima yaJesus mongudu yovanhu ndele ta kwata komungenge woshikutu shaye shokombada. Diva okwa li a veluka. Konima yaasho, Jesus okwa pula a ti: “Olyelye a kuma nge?” Omukainhu okwa li a tila, ndele ta i puJesus noku mu lombwela oshili. Jesus okwa li e mu hekeleka ta ti: ‘Omumwangekadona, inda nombili.’

Omunambelewa wedina Jairus okwa li a indila Jesus ta ti: ‘Ila keumbo lange, okamonakadona kange otaka vele neenghono.’ Ashike fimbo Jesus ina ya keumbo laJairus, okakadona oka fya. Eshi Jesus a fika, okwa li a mona kutya ovanhu vahapu ove uya keefya. Jesus okwe va lombwela a ti: ‘Inamu kwena, okakadona oka kofa ashike.’ Opo nee okwa kwata eke lokaana ndele ta ti: ‘Okakadona, penduka.’ Diva, okakadona oka kala omutumba, na Jesus okwa li a lombwela ovadali vako ve ka pe oikulya. Ovadali vako kava li tuu va hafa neenghono!