တၢ်မၤလိ ၇၉
ယ့ၣ်ၡူးမၤတၢ်လီၤလးတဖၣ်
ယ့ၣ်ၡူးဟဲလီၤလၢဟီၣ်ခိၣ်ချၢ ဒ်သိးကစံၣ်တဲၤတဲလီၤ တၢ်သးခုကစီၣ်အဂီၢ်လီၤ. ယဟိဝၤယွၤ ဟ့ၣ်လီၤအီၤသးစီဆှံလၢ အကမၤတၢ်လီၤလးတဖၣ်လီၤ. အဃိ ယ့ၣ်ၡူးမၤဘျါဝဲတၢ်ဆါ ကိးမံၤဒဲးသ့ဝဲလီၤ. တၢ်လီၤလးတဖၣ်အံၤ ပာ်ဖျါထီၣ်တၢ်လၢယ့ၣ်ၡူး ကမၤန့ၢ်ပှၤဟီၣ်ခိၣ်ဖိ ဖဲအဝဲပၢတၢ်ဒ်စီၤပၤအခါန့ၣ်လီၤ. ဖဲယ့ၣ်ၡူးလဲၤဝဲ တၢ်လီၢ်တပူၤလၢ်လၢ်န့ၣ် ပှၤဆူးပှၤဆါဟဲလၢအအိၣ် ဒီးယ့ၣ်ၡူးမၤဘျါကွံာ် အဝဲသ့ၣ်ကိးဂၤဒဲးလီၤ. ပှၤမဲာ်ဘျီၣ်ထံၣ်ထီၣ်က့ၤတၢ်, ပှၤနၢ်တအၢ နၢ်ဟူထီၣ်က့ၤတၢ်, ပှၤခီၣ်ဟးဂီၤဟးထီၣ်က့ၤသ့ ဒီးယ့ၣ်ၡူးနီဟးထီၣ်ကွံာ် တၢ်ဝံတၢ်နါလၢအအိၣ်လၢပှၤလိၤလီၤ. ပှၤဆါမ့ၢ်ဖီၣ်ဘၣ်ထဲ ယ့ၣ်ၡူးအဆ့ကၤတစဲးဖိဒၣ်လဲာ် အဝဲသ့ၣ်ဘျါက့ၤဝဲလီၤ. ဖဲယ့ၣ်ၡူးလဲၤဝဲလၢ တၢ်လီၢ်တတီၤတီၤန့ၣ် ပှၤဂီၢ်မုၢ်လဲၤပိာ်ဝဲအခံလီၤ. တဘျီတခီၣ် ယ့ၣ်ၡူးအဲၣ်ဒိးအိၣ်ဝဲထဲတဂၤဧိၤ ဘၣ်ဆၣ် ပှၤမ့ၢ်လဲၤဆူ အအိၣ်န့ၣ် အဝဲတနီက့ၤ အဝဲသ့ၣ်နီတဂၤဘၣ်.
ဘၣ်တဘျီ ပှၤဟဲစိာ်ဝဲပိာ်ခွါလၢအလီၤဘျ့ ဆူဟံၣ်လၢယ့ၣ်ၡူးအိၣ်ဝဲန့ၣ်လီၤ. ဘၣ်ဆၣ် ဟံၣ်န့ၣ်ပှဲၤဝဲဒီးပှၤကညီအဃိ အဝဲသ့ၣ်နုာ်လီၤဝဲတန့ၢ်ဘၣ်. လၢတၢ်န့ၣ်အဃိ အဝဲသ့ၣ်မၤဖျိဟံၣ်ခိၣ်ဒီး စဲၤလီၤပှၤဆါတဂၤအံၤလၢဟံၣ်ခိၣ် ဆူယ့ၣ်ၡူးအအိၣ်လီၤ. ဝံၤဒီးယ့ၣ်ၡူးတဲဘၣ်ပိာ်ခွါတဂၤအံၤလၢ– ‘ဆၢထၢၣ်ဒီးဟးတက့ၢ်.’ ဖဲပိာ်ခွါန့ၣ် ဆၢထၢၣ်ဒီးဟးဝဲအခါ ပှၤအါဂၤကမၢကမၣ်ဝဲဒိၣ်မးလီၤ.
အဂၤတဘျီ ဖဲယ့ၣ်ၡူးလဲၤနုာ်လီၤလၢ သဝီတဖျၢၣ်အခါ ပှၤဘၣ်တၢ်ဆါအၢအဂၤတဆံ ဆၢထၢၣ်ဝဲလၢအယံၤ ဒီးကိးပသူထီၣ်ဝဲလၢ– ‘ယ့ၣ်ၡူးဧၢ, မၤစၢၤပှၤတက့ၢ်.’ ဖဲစိၤအဝဲန့ၣ် ပှၤဘၣ်တၢ်ဆါအၢတဖၣ် အိၣ်ဘူးဒီးပှၤအဂၤတန့ၢ်ဘၣ်. ယဟိဝၤယွၤအတၢ်သိၣ်တၢ်သီအိၣ်ဝဲလၢ ဖဲပှၤဘၣ်တၢ်ဆါအၢတဖၣ် အတၢ်ဆါဘျါက့ၤအခါ အဝဲသ့ၣ်ဘၣ်လဲၤဆူတၢ်လုၢ်ဟံၣ်လီၤ. လၢတၢ်န့ၣ်အဃိ ယ့ၣ်ၡူးမၢပှၤဘၣ်တၢ်ဆါအၢတဖၣ်အံၤ လဲၤဝဲလၢတၢ်လုၢ်ဟံၣ်လီၤ. ဖဲအဝဲသ့ၣ်လဲၤလၢကျဲအခါ အတၢ်ဆါဘျါက့ၤဝဲလီၤ. ပှၤဘၣ်တၢ်ဆါအၢတဖၣ်အကျါတဂၤန့ၣ် ဟဲက့ၤစံးဘျုးစံးဖှိၣ်က့ၤဝဲ ယ့ၣ်ၡူးဒီး စံးထီၣ်ပတြၢၤဝဲကစၢ်ယွၤလီၤ. လၢပှၤဘၣ်တၢ်ဆါအၢ အဂၤတဆံအကျါန့ၣ် ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်အိၣ်ဝဲထဲတဂၤလီၤ.
ပိာ်မုၣ်လၢအဆါတ့ၢ် ၁၂ နံၣ်တဂၤအံၤ အဝဲအဲၣ်ဒိးလၢအတၢ်ဆါ ကဘျါက့ၤသပှၢ်ကတၢၢ်လီၤ. အဃိ ဖဲယ့ၣ်ၡူးဟးဝဲလၢ ပှၤဂီၢ်မုၢ်အကျါအခါ အဝဲလဲၤလၢယ့ၣ်ၡူးအလီၢ်ခံ ဒီးဖီၣ်အဆ့ကၤတစဲးလီၤ. တဘျီဃီန့ၣ် ပိာ်မုၣ်တဂၤအံၤ အတၢ်ဆါဘျါက့ၤဝဲလီၤ. ဖဲတၢ်မၤအသးဒ်န့ၣ်အခါ ယ့ၣ်ၡူးတဲဝဲလၢ– “မ့ၢ်မတၤထိးဘၣ်ယၤတဂၤလဲၣ်.” ပိာ်မုၣ်အံၤ ပျံၤတၢ်ဒိၣ်မး ဘၣ်ဆၣ် အဝဲလဲၤဆူယ့ၣ်ၡူးအအိၣ်ဒီး တဲဘၣ်ယ့ၣ်ၡူးတၢ်မ့ၢ်တၢ်တီလီၤ. ဒီးယ့ၣ်ၡူးမၤမုာ်ထီၣ်က့ၤအသး ခီဖျိလၢ အဝဲတဲဘၣ်အီၤလၢ– ‘ဖိမုၣ်ဧၢ, က့ၤမုာ်မုာ်တက့ၢ်.’
ဘူၣ်ဘျီၣ်ခိၣ်တဂၤလၢအမံၤမ့ၢ် စီၤယၤအ့ၤရူးန့ၣ် ဃ့ကညးယ့ၣ်ၡူးလၢ– ‘ဟဲလၢယဟံၣ်မီၤ ယဖိမုၣ်အိၣ်တဆူၣ်ဘၣ်.’ ဘၣ်ဆၣ် တချုးလၢယ့ၣ်ၡူးလဲၤတုၤလၢ စီၤယၤအ့ၤရူးအဟံၣ်န့ၣ် ဖိသၣ်ပိာ်မုၣ်သံဝဲလံ. ဖဲယ့ၣ်ၡူးလဲၤတုၤဝဲအခါ အဝဲထံၣ်ဘၣ်ဝဲလၢပှၤအါဂၤ ဟီၣ်ဃုာ်ဒီးစီၤယၤအ့ၤရူး အဟံၣ်ဖိဃီဖိလီၤ. ယ့ၣ်ၡူးတဲဘၣ်အဝဲသ့ၣ်လၢ– ‘ဟီၣ်တဂ့ၤ, ပိာ်မုၣ်ဖိသၣ်အံၤမံဝဲလီၤ.’ ဝံၤဒီးယ့ၣ်ၡူးဖီၣ်ထီၣ်ပိာ်မုၣ်ဖိသၣ် အစုဒီး တဲဝဲလၢ– “ပိာ်မုၣ်ဖိသၣ်ဧၢ, ဂဲၤဆၢထၢၣ်တက့ၢ်.” တဘျီဃီန့ၣ် ပိာ်မုၣ်ဖိသၣ်ဂဲၤဆၢထၢၣ် ဒီးယ့ၣ်ၡူးတဲဘၣ်ဖိသၣ်အမိၢ်အပၢ်လၢ ဒုးအီၣ်ဖိသၣ် တၢ်အီၣ်တမံၤမံၤတက့ၢ်. ပိာ်မုၣ်ဖိသၣ်အံၤ အမိၢ်အပၢ်ကသးခုထဲလဲၣ်.
“ယွၤဖှူပှၤနစၤရ့းဖိယ့ၣ်ၡူးလၢ သးစီဆှံဒီးတၢ်အစိအကမီၤလီၤ. အဝဲဒၣ်န့ၣ်လဲၤသကုၤဆးဒးဒီးမၤဂ့ၤတၢ်, ဒီးမၤဘျါက့ၤကယဲၢ်ပှၤလၢ မုၣ်ကီၤလံၢ်မၤအၢမၤနးအီၤလီၤ. အဂ့ၢ်ဒ်အံၤ, ယွၤအိၣ်ဒီးအီၤလီၤ.”—မၤတၢ် ၁၀:၃၈, ၃၉
